Pandhansari, Kajoran, Magelang

Pandhansari
Désa
Pandhansari Pandhansari Pandhansari
Koordhinat: 7.49156°S 110.05754°E / -7.49156; 110.05754
Nagara	Indonésia
Provinsi	Jawa Tengah
Kabupatèn	Magelang
Kacamatan	Kajoran
Kodhe laladan administrasi	33.08.12.2018

Pandhansari (ꦥꦤ꧀ꦝꦤ꧀ꦱꦫꦶ, Transkripsi Jawi: Pandhansari) inggih punika désa ing Kacamatan Kajoran, Kabupatèn Magelang, Jawa Tengah. Indonesia. Desa Pandansari wonten ing koordinat 7˚ 30' 15,8" Lintang Kidul lan 110˚ 04' 45" Bujur Wétan, kaliyan keinggilan rata-rata 645 mdpl, saha désa punika dumunung wonten sisih kiléning kabupatén Magelang leresipun ing wates antawis kabupatén Magelang lan kabupatén Wanasaba.

Pamérangan Administrasi

Désa sawiyar 3,9 km² punika dipunpérang dhateng lebet 3 dhusun, lajeng dipun pérang malih dhateng satuan wilayah ingkang langkung alit dhateng lebet 5 rukun warga (RW) lan 16 rukun tetangga (RT).

Punika pratélan nami dhusun wonten Désa Pandhansari:

1. Dhusun Pandhansari (ꦣꦸꦱꦸꦤ꧀ꦥꦤ꧀ꦝꦤ꧀ꦱꦫꦶ) nyakup dukuhan Pandansari/Krajan (ꦥꦤ꧀ꦝꦤ꧀ꦱꦫꦶ/ꦏꦿꦗꦤ꧀) kanthi pitung RT lan Séngonan (ꦱꦺꦔꦺꦴꦤꦤ꧀) kanthi satunggal RT.
2. Dhusun Bumiharja (ꦣꦸꦱꦸꦤ꧀ꦧꦸꦩꦶꦲꦂꦗ) nyakup dukuhan Sirata (ꦱꦶꦫꦠ) kanthi satunggal RT, Sigedhangan (ꦱꦶꦒꦼꦣꦔꦤ꧀) kanthi satunggal RT, lan Sabrang Kulon (ꦱꦧꦿꦁꦏꦸꦭꦺꦴꦤ꧀) kanthi satunggal RT.
3. Dhusun Tanjungsari (ꦣꦸꦱꦸꦤ꧀ꦠꦚ꧀ꦗꦸꦁꦱꦫꦶ) nyakup dukuhan Jabalamar (ꦗꦧꦭꦩꦂ) kanthi kalih RT, Sinampan (ꦱꦶꦤꦩ꧀ꦥꦤ꧀) kanthi satunggal RT, lan Ngempon (ꦔꦼꦩ꧀ꦥꦺꦴꦤ꧀) kanthi kalih RT.

Jarak désa punika dhateng pusat kecamatan inggih punika 10 km, déné jarak kaliyan ibukota kabupatén Magelang wonten Kota Mungkid inggih punika satebih 27 km. Parandéné rodhaning pamarintahan tingkat désa dipunpusataken wonten Balé Désa Pandhansari ingkang gadhah alamat wonten Dusun Pandansari RT 003 RW 001. Kanggé perlu Pemilu 2024, pandhudhuk désa Pandhansari dipunpérang lan dipunladosi wonten 6 Tempat Pemungutan Suara (TPS).

Wates-Wates Tlatah

Désa Pandhansari nggadhahi wates nun inggih:

• Lér: kaliyan désa Sukareja
• Wétan: kaliyan désa Pandhanretna, ingkang kepisah déning ilénan lépén
• Kidul: kaliyan désa Wuwuharja
• Kilén: kaliyan tlatah Kabupatén Wanasaba inggih punika désa Kalipuru, kecamatan Kepil

Géografi

Adhedhasar kategori ingkang wonten, Désa Pandhansari kelebet nggadhahi status Padhusunan (Pedesaan), ingkang papan wonten Puncak/Léréng, lan wonten ing Sawentawis/Tepining wana.

Démografi

Adhedhasar data Kecamatan Kajoran dalam Angka 2022, pandhudhuk Désa Pandhansari sacacah 1.809 jiwa madeg saking 950 jaler lan 859 éstri kaliyan rasio jinis kelamin 111, cacahing pandhudhuk punika nyumbang 2,95% saking total populasi kecamatan Kajoran.

Kepala Désa/Lurah

Saking wiwiting kamardikan Indonésia ngantos samangké désa Pandhansari sampun ngalami pinten-pinten kaping panggantosan pamimpin utawi Kepala Desa ingkang dhéfinitif utawi Pejabat (Pj) Kades. Punika Kepala Desa dhéfinitif ingkang naté mimpin Pandhansari.

1. Sanyoto Sastro Suwoto (ꦯꦚꦠꦯꦱ꧀ꦠꦿꦯꦸꦮꦠ Sanyata Sastra Suwata) utawi mbah Glondhong, sampun séda ing 2003.
2. Sutopo E.S. (ꦯꦸꦠꦥ꧈ꦌ꧈ꦌꦱ꧀ Sutapa E.S.), sadéréngipun dados kades inggih punika Pak Carik (Sekretaris Desa). sampun séda.
3. Adi Setia Tama (ꦄꦢꦶꦯꦼꦠꦾꦡꦩ Adi Setya Tama), naté mimpin sadangunipun 2 periodhe.
4. Hariyono (ꦲꦫꦶꦪꦤ Hariyana) 2013-2019
5. Liswanto (ꦭꦶꦱ꧀ꦮꦤ꧀ꦠ Liswanta) 2019-samangké

Poténsi

Gumuk Sinampik ingkang nggadhahi kaéndahan wananipun ingkang saged damel suka renaning penggalih nalika mriksani. Papanipun sanginggiling pemukiman Sinampan ngiras jalur tembus tumuju dhusun Patran (tlatah kabupatén Wanasaba) prayogi dipunkunjungi kanggé ngénggar-énggar penggalih. Margi tembus punika dipunusahakaken kanthi gotong royong manunggal antawisipun wargi désa Pandhansari lan TNI saking Kodim 0507 Magelang. Poténsi ékonomi wonten tlatah Pandhansari iinggih punika cocok dipuntanemi sayur mayur lan woh-wohan. Woh-wohan unggulanipun inggih punika salak pondhoh. gedhang raja, lan gedhang byar.

Samangké sampun sumadya fasilitas pendhidhikan wonten 2 PAUD/TK lan 1 SD. Pandhansari nggadhahi TK Pertiwi wonten dhusun Tanjungsari lan PAUD Pelangi Ceria wonten dhusun Pandhansari. Déné SD Nagari Pandansari wonten ing dhusun Tanjungsari. Kanggé siswa SD saking dhusun Pandhansari minangka dhusun paling kidul piyambak mila kanggé tumuju sekolah wonten sisih lér sawentawis 1,5 km saéngga Pamarintah Désa paring pambiyantu arupi fasilitas angkutan desa (angkudes) kanthi gratis kanggé bidhal dhateng sekolah. Ing babagan Kasarasan, désa punika namung gadhah setunggal Balai Kesehatan Desa (BKD) wonten dhusun Tanjungsari ingkang ngiras dados dalem dhinesipun bidan désa. Déné fungsi pendukung kesarasan mila kegiatan wonten 3 Posyandu tetep dipunwontenaken saben wulanipun.