Kabupatèn Blora: Béda antara owahan

Saka Wikipédia Jawa, bauwarna mardika basa Jawa
Luru sajarah
← Besutan sadurungéBesutan sawisé →
Konten dihapus Konten ditambahkan
VisualTèks wiki
PL 05 SIGIT (parembugan | pasumbang)
5.491 suntingan
Top4Bot (parembugan | pasumbang)
Bot
352.737 suntingan
→‎Panganan Khas Blora: éjaan, replaced: tapi → nanging
Larik 227: Larik 227:
* '''Woh-wohan.''' [[Siwalan]], [[Mindhik]], [[Juwet]], [[Jambu Ménté]].
* '''Woh-wohan.''' [[Siwalan]], [[Mindhik]], [[Juwet]], [[Jambu Ménté]].
* '''Janganan.''' [[Krai]], [[Plonco]] utawa [[Gendhoyo]], [[Temu Kunci]].
* '''Janganan.''' [[Krai]], [[Plonco]] utawa [[Gendhoyo]], [[Temu Kunci]].
* '''Krupuk Sarmiyer (Samiler). '''di gawé soko puhung, diprodhuksi paling akèh ana ing désa Wantilgung Kacamatan Ngawén. racaké diiderne gawé pikulan nyampek Suroboyo, Semarang, Malang lan liya-liyané. tapi paling akèh diiderne ana ing Suroboyo.
* '''Krupuk Sarmiyer (Samiler). '''di gawé soko puhung, diprodhuksi paling akèh ana ing désa Wantilgung Kacamatan Ngawén. racaké diiderne gawé pikulan nyampek Suroboyo, Semarang, Malang lan liya-liyané. nanging paling akèh diiderne ana ing Suroboyo.


=== Jarak Antarané Kutha krajan Kacamatan ing Kabupatèn Blora (KM) ===
=== Jarak Antarané Kutha krajan Kacamatan ing Kabupatèn Blora (KM) ===

Révisi kala 27 Sèptèmber 2017 08.53

Kabupatèn Blora
Lambang Blora
Sesanti: "Çaçana Jaya Kerta Bhumi"
align="center" colspan="2"
Dina Dadi: 11 Dhésèmber 1749
Kutha krajan: Kutha Blora
Bupati: Djoko Nugroho
Wakil Bupati: Arief Rohman
Ketua DPRD: Bambang Susilo
Jembar
 - Total:
1.821,40 km²
Kacamatan
 - Cacahe:
16 Kacamatan
Padunung
 - Total:
 - Kapadhetan:
+/- 0,887 yuta
+/- 661 / km²
Suku Bangsa: wong Jawa(Suku Asli), Samin(Suku Asli), Cina, Arab, Sunda, Malayu
Kode Telepon: 0296
Tanduran Asli Jati lan Kelor
Kéwan Asli Betet lan Kijang
Agama: Islam, Kajawèn, Protèstan, Katulik, Hindhu lan Buda
Basa: Dhialek Blora, Basa Jawa lan Basa Indonésia

Kabupatèn Blora ya iku kabupatèn ing Jawa Tengah, pernahé ing sisih wétan, tapel wates karo Provinsi Jawa Wétan, udakara 127 km sisih wétané Semarang. Kutha Blora iku kutha krajan kabupatèné, déné kutha-kutha liyané : Cepu, Ngawèn, Kunduran, Jepon, Jiken, Doplang, Randublatung, Kradenan lan liya-liyané. Jembaré wewengkon Kabupatèn iki ± 1.821,40 km2 utawa 182.140 hèktar. Salah sawijining laladan ilèn Bengawan Solo sing diarani Bengawan Soré, kawentar minangka laladan sing dadi lokasi perang antarané Arya Penangsang lan Sutawijaya sing dicaritaaké ana ing Legenda Arya Jipang. Liyané Legenda Arya Penangsang karo jaran Gagak Rimangé, Kabupatèn Blora uga kawentar déning anané ajaran Saminisme sing asalé saka tlatah Klopodhuwur Blora. Masarakat Samin iki kerep banget didadèkaké obyèk panalitèn déning para mahasiswa utawa peneliti liyané saka Universitas Gadjah Mada lan Lembaga Pawiyatan Luhur liyané.

Sajarah

Kirab Dina Dadi Kabupatèn Blora ke-261

Kawit jaman Karaton Pajang nganti jaman Karaton Mataram Kabupatèn Blora arupa laladan wigati tumrap Pamaréntahan Pusat Kraton, amarga Blora kawentar alas jatiné. Blora wiwit owah statusé saka apanage dadi laladan Kabupatèn ana ing dina Kamis Kliwon, tanggal 2 Sura taun Alib 1675, utawa tanggal 11 Dhésèmber 1749 Masehi, lan nganti saiki dadi DINA DADI KABUPATEN BLORA. Bupati sing kapisan ya iku WILATIKTA. Sajarah perlawanan Rakyat Blora nglawan penjajah Walanda sing dipelopori déning para among tani diwiwiti ing akir abad ka 19 lan awal abad ka 20. Perlawanan para tani iku mau magepokan karo sangsaya munduré kaanan sosial lan ékonomi warga désa. Pajak Kepala sing ditrapaké nalika taun 1882 pancèn dirasa abot déning para tani saéngga para tani dipanggedhèni déning Samin Surosentiko miwiti perlawanan sing misuwur ana sajarah minangka Gègèr Samin.[1].

Géografi

Kabupatèn Blora duwé tlatah sing paling endhèk 30 nganti 280 mèter sak ndhuwuré lumah segara, déné sing paling dhuwur nganti 500 mèter sak ndhuwuré lumah segara. Kacamatan Japah minangka tlatah sing paling dhuwur, déné Kacamatan Cepu minangka tlatah sing paling endhèk dhéwé. Wewengkon Kabupatèn Blora diapit déning Pagunungan Kendheng Lor lan Pagunungan Kendheng Kidul, kanthi susunan lemah arupa 56 % gromosol, 39 % mediteran lan 5 % aluvial. Miturut tata guna tanah, laladan alas minangka tlatah sing paling amba dhéwé ya iku kurang punjul 90 hèktar utawa 49,66 persèn, disusul lahan sawah kurang luwih 46 hèktar lan tegalan 26 hèktar.[2] Kacamatan Cepu sing kawentar sugih kekandutan lenga patra (Blok Cepu), minangka wates karo Provinsi Jawa Wétan (Kabupatèn Bajanegara lan Kabupatèn Ngawi). Tapel wates mau arupa tapel wates alam, ya iku Kali Bengawan Solo.

Dunungé

Kabupatèn Blora dumunung ana ing wewengkon paling pucuk wétan Provinsi Jawa Tengah. Jarak paling adoh saka kulon mengétan antara 57 km lan jarak paling adoh saka lor mengidul kira-kira 58 km.

Pintu Gerbang ke Blora saka arah Purwodadi

Wates Astronomis

Kabupatèn Blora dumunung ana ing antarané 111°0'16" nganti 111°33'8" Bujur Wétan lan antarané 6°5'28" nganti 7°2'48" Lintang Kidul.[3]

Wates Administratif

Pamaréntahan

Kabupatèn Blora ketata sajeroning 16 kacamatan, 24 kalurahan lan 271 désa. Kacamatan-Kacamatan ing Kabupatèn Blora ya iku:

Bakul Legen ning Alun-alun Blora

Ékonomi

Barkas:Kerajinan Jati saka Jepon Blora.jpg
Kerajinan Jati di Jepon Blora
Alas Jati Blora

Batik Tulis Blora ing Klopodhuwur lan Blumbangreja Pabrik Gulha GMM Tinapan

Tetanèn

Pertanian minangka sèktor utama perékonomian Kabupatèn Blora. Pari, téla pohung, lombok abang, dadi produk unggulan masarakat tani ing Blora. Nanging kuciwané akèh sawah sing durung keduman pengairan saéngga panèné mung setahun pisan. Yèn mangsa ketiga para among tani padha nandur semangka, timun, utawa krai. Déné sub sèktor kahutanan pancèn Kabupatèn Blora wis kawentar biyèn mula minangka tlatah sing ngasilaké kayu jati sing kualitasé paling apik ing Pulo Jawa. Kurang luwih 49,66 persèn luas tlatah Kabupatèn Blora dipigunakan kanggo alas nagara, kapara dadi telung kesatuan administrasi ya iku KPH Randublatung, KPH Cepu, lan KPH Blora.

Dedagangan

Komoditas dagang sing paling utama ing Blora arupa produk kayu jati, kaya ta indhustri asil kayu, mèbel, kerajinan kayu gémbol, kerajinan sovenir saka bahan kayu jati. Saliyané iku produk-produk hasil tetanèn arupa pari utawa beras, gedhang, jagung, téla, lombok abang, lan liya liyané.

Pertambangan

Kabupatèn Blora wiwit jaman Walanda wis kawentar minangka laladan penghasil lenga patra. Jaman biyèn diolah déning Perusahaan Walanda BPM. Nganti sapréné isih ana tilasé arupa sumur-sumur lenga sing isih migunakaké pompa angguk. Liyané iku uga ana Akademi Migas ing tlatah Sorogo sing saiki jenengé dadi Pusat Wiyata Latihan Migas. Sawisé mati puluhan taun, ora ana penambangan manèh, ujug-ujug taun 2006 tinemu cadangan lenga sing akèh banget ing tlatah Blora lan Bojonegoro sing kawentar kanthi jeneng Blok Cepu. Ladang lenga patra sing kawentar kanthi jeneng Blok Cepu ambané 45 km saka sisih wétan laladan Kapas, Kabupatèn Bajanegara nganti sisih kulon ing Kedung Tuban, Kabupatèn Blora iku, kira-kira ngandut cadangan lenga patra nganti 650 yuta barel lan 1,7 triliun cubic feet gas alam. Masarakat Indonésia mligi warga Blora lan Bojonegoro mesthi waé ngrasa bungah lan antusias arep diwiwitiné pengeboran sumur-sumur lenga Blok Cepu ana ing pungkasan taun 2007.

Transportasi

Kabupatèn Blora diliwati dalan provinsi sing nyambungaké kutha Semarang lan kutha Surabaya ngliwati Kutha Purwodadi. Dalan liyané sing kalebu wigati ya iku dalan sing nyambungaké kutha Rembang, Blora, Cepu, Bojonegoro, Suroboyo. Sing parané ngidul saka Cepu bisa liwat Ngawi terus Mediun utawa Sragen. Jalur sepur uga ngliwati tlatah Kabupatèn Blora, ya iku jurusan Jakarta-Suroboyo sing mandheg ana ning Stasiun Cepu.

Pratélan Bupati Blora

Potrèt Radèn Toemenggoeng Ario Said, Bupati Blora kaping sewelas (1921).

Pratélan Bupati Blora saka taun 1749-2012:[4]

  1. Toemenggoeng Wilatikta (1749-1762)
  2. Toemenggoeng Djajeng Tirtanata (1762-1782)
  3. R.T. Tirtakoesoema (1782-1812)
  4. R.T. Prawirajoeda (1812-1823)
  5. R.T. Tirtanagara (1823-1742)
  6. R.T.A. Tjakranagara I (1842-1843)
  7. R.T. Tirtanagara (1843-1847)
  8. R.T. Natawidjaja (1847-1857)
  9. R.T.A. Tjakranagara II (1857-1886)
  10. R.M.T. Tjakranagara III (1886-1912)
  11. R.M. Said Abdoelkadir Djaelani (1912-1926)
  12. R.M. Tjakraningrat (1926-1938)
  13. R.M. Moerdjana Djajadigda (1938-1942)
  14. R.M. Soedjana (1942-1945)
  15. Mr. Iskandar (1945-1948)
  16. R. Wibisono (1948-1949)
  17. R. Siswadi Djajadigda (1949-1952)
  18. R. Soedjono (1952-1957)
  19. R. Soenartio (1957-1960)
  20. R. Soekirno Sastrodimedjo (1960-1967)
  21. Srinardi (1967-1973)
  22. Soepandi Joedodarmo (1973-1979)
  23. H. Soemarno, S.H (1979-1989)
  24. H. Soekardi Hardjoprawiro, MBA (1989-1999)
  25. Ir. H. Basuki Widodo (1999-2007)
  26. R.M. Yudhi Sancoyo (2007-2010)
  27. Djoko Nugroho (2010-2015)
  28. Ir.Ihwan Sudrajat (2015-2016) Pejabat Bupati
  29. Djoko Nugroho (2016-Saiki)

Wiyata

No. Jinis Sekolah Jumlah Sekolah/Akademi/PT Jumlah Guru/Dosen
1 Sekolah Dasar 663 4 690
2 Sekolah Lanjutan Tingkat Pertama 77 1 577
3 Sekolah Lanjutan Tingkat Atas 42 1 151
4 MIN / MIS (Ibtidaiyah) 53 438
5 MTsN / MTsS (Tsanawiyah) 40 513
6 MAN / MAS (Aliyah) 10 157
7 Akademi 5 38
8 Perguruan Tinggi 3 26

Sumber Data : Deptan 2000 [1]

Budaya

Kasenian

  • Seni Tayuban. Tayuban iku seni kabudayan tradisional sing sumebar ana ing tlatah Blora lan saubengé. Saliyané kanggo nyambut tamu kaurmatan, tayuban uga dipéntasaké nalika sedekah bumi utawa pista-pista adat liyané. Ing sajeroning tayuban para tamu sing ketiban sampur olèh kaurmatan kanggo njogèt bareng karo penari tayub.[5] Perkembangan sakbanjurè seni tayub uga ngetutaké perkembangan seléra masarakat ya iku lebur dadi siji karo musik [dangdut] lan [campursari] sing lagi digandrungi warga. Sawetara iku dampak negatipé uga ana ya iku banjur dicampuri ananing minuman keras lan tindak tanduk sing mengarah kurang trapsila, kaya déné sing katulis ana ing kalawarta Intisari lan kalawarti Kompas.[6],[7],[8]
    Wayang Krucil koleksi Musiyum Mahameru Blora
  • Barongan. Kesenian Barong utawa Barongan minangka sawijining kesenian rakyat Jowo Tengah. Nanging yèn dibandingaké karo saerah-laladan liya ing Jowo Tengah, sumebaré seni barongan ing Blora pancèn luwih akèh. Liwat Barongan, katon sipat kerakyatané masarakat Blora, antarané sipat spontan, kulawargan, prasaja, kasar, kuwat, rukun, lan wani lalandhesan kebenaran. Kesenian iki awujud tarian golongan sing nirokaké Singabarong sing prakosa lan tokoh liyané ya iku Bujangganong, Joko Lodro, Reog, Noyontoko, lan Untub.[9]
  • Wayang Krucil. Tontonan Wayang Krucil wis rada langka. Sisa-sisa wayangé ana ing tlatah Blora kari didarbèni déning sawetara warga antarané déning dhalang Wayang Krucil Supangkat (45), penduduk Désa Janjang Kacamatan Jiken, Blora. Wayang Krucil, utawa ing tlatah liya dijenengi Wayang klithik iku digawé saka kayu. Nanging rada béda karo Wayang Golek sing awaké wangun gilig kaya manungsa, wayang krucil wanguné gèpèng, mèmper wayang kulit. Déné gedebog sing biyasané dienggo nancepaké wayang diganti nganggo kayu sing di bolongi.[10]
  • Kentrung. Kesenian kentrung awujud seni ndongèng sing dalangé carita sinambi nabuh kentrung, ya iku sawijiné piranti tetabuhan kaya rebana.

Ajaran Samin (Saminisme)

  • Ajaran Kebathinan Samin. Miturut warga Samin ing désa Tapelan, Samin Surosentiko punika saged nulis saha ngraos aksara Jawa, katilik saking anané buku paninggalan ingkang tinemu wonten Tapelan wonten désa-désa liyané. Buku tilas Samin Surosentiko ingkang wonten ing désa Tapelan diarani Serat Jamus Kalimasada. Buku punika kapèrang dadi sawetara buku antarané Serat Uri-Uri Pambudi, ya iku buku ingkang isinipun ngupakara budi pekerti manungsa. Ajaran Kebatinan Samin Surosentiko apunjer wonten kawruh manunggaling kawula gusti utawa sangkan paraning dumadi ingkang dipunibaratakén warangka manjing cubriya. Kanggo nglawan Pemerentah Kolonial Walanda, Samin Surosentiko ngajak para pendhèrèké nulak mbayar pajeg, nulak ndandani dalan, nulak ronda wengi saha nulak makarya peksa/rodi. Perkara kanagaran uga winten Serat Pikukuh Kasajaten ajaran Samin Surosentiko, inggih punika nagara bakal kawentar saha wibawa manawi saged didadèkaké panggonan ngeyub kanggo wargané saha para warga tansah nguri-uri ngèlmu pangetahuan saha urip tentrem.[11]
  • Geger Samin. Samin Surosentiko lair taun 1859, ing désa Ploso Kedhiren, Randublatung, Kabupatèn Blora. Ramanipun ingkang namanipun Radèn Surowijaya nanging luwih koncar kanthi tetenger Samin Sepuh. Jeneng asliné sakbeneré Radèn Kohar, nanging tembé mburi diowahi dadi Samin, jeneng ingkang luwih kemrakyat. Wiwit taun 1890, Samin Surosentiko nyebaraké ajarané wonten tlatah Klapadhuwur, Blora.kathah warga désa saubengé ingkang uga kepéncut marang ajarané, saéngga sajeroning wektu ora suwé wis akèh warga sing dadi muridé. Wektu punika Pemerentah Kolonial Walanda dèrèng pati ngrèwès amarga dianggep ajaran kebathinan biyasa utawa agama anyar ingkang boten mbebayani tumraping pemerentah kolonial. Ana ing taun 1903 Residen Rembang nglapuraké yèn ana sawetara 711 pendhèrèk Samin sing nyebar ana ing 34 désa ing Blora bagèan kidul saha Bojonegoro lagi padha nyebaraké ajaran Samin. Tekan titi wanci taun 1907 warga Samin sampun tambah ngrembaka dadi limang èwunan. Pemerentah Kolonial Walanda wiwit ngrasa was-was saéngga kathah pendèrèk Samin ingkang dicekel saha dikunjara. Nalika tanggal 8 Nopember 1907, Samin Surosentiko diangkat déning pendhèrèké dadi Ratu Adil, kanthi gelar Prabu Panembahan Suryangalam. Patang puluh dina sawisé pemgangkatan mau Samin Suryosentiko dicekel déning Radèn Pranolo, Asisten Wedana Randublatung. Sawisé dicekel, Samin lan 8 pendhèrèké dibuang ning luar Jawa nganti sak tilar donyané ing taun 1914. Kanthi dicekelé Samin tibaké boten numpesaké Gerakan Samin. Tahun 1908, Wongsorejo, salah sawijining pendhèrèk Samin nyebaraké ajaran Samin wonten Madiun. wonten punika warga désa diasut supaya boten mbayar pajeg marang pemerentah Kolonial. Sidané Wongsorejo lan pendhèrèké uga dicekel saha dibuang wonten njabanipun pula Jawa. Tahun 1911, Surohidin, mantunipun Samin Surosentiko kalih Engkrak, salah sawijining pendhèrèké, nyebaraké ajaran Samin wonten tlatah Grobogan; déné Karsiyah nyebaraké ajaran Samin ing tlatah Kajèn, Pathi. Ana ing taun 1912 pendhèrèk ajaran Samin nyoba nyebaraké ajaran wonten tlatah Jatirogo, Tuban, nanging boten kasil. Tahun 1914, minangka pucuking Geger Samin, amarga Pemerentah Walanda ngunggahaké pajeg, malahan wonten sawetara tlalah kaya ta wonten Purwadadi, Madiun, Pathi saha Bojonegoro, wong-wong Samin sampun boten ngregani para Pamong Désa saha Pulisi. Tahun 1930 perlawanan Samin tumrap Pemerentah Kolonial mandheg amarga boten wonten figur pemimpin ingkang kuwat. Saking data ingkang tinemu wonten Serat Punjer Kawitan, disimpulaké manawi Samin Surosentiko inggih punika sawijining Pangèran utawa bangsawan ingkang nyamar dumados wong cilik kanggo ngumpulakén kekuatan rakyat kanggo nglawan pemerentah Kolonial Walanda.[11]

Panganan Khas Blora

  • Saté Blora. Sing paling populèr arupa saté pitik sing disundhuki cilik-cilik nganggo bumbu kacang. Bubar mangan sing di itung sujèné sing digawé saka sada. Salah sawijiné bakul sate ayam sing kawentar enak lan bukak rina (sing akèh sate ayam bukak mbengi) ya iku sate Pak Kadirun, kidul Kantor Polantas anyar - biyèn Polres Blora. Jinis saté liyané ya iku saté jagal utawa saté daging sapi lan saté wedhus.
Mangut Iwak Pé
  • Soto Klethuk. Ora pati béda karo soto saka laladan liya, mung ning Blora sotoné nganggo klethuk, ya iku gorèngan gemblong telo sing diirisi cilik-cilik marakké tambah mirasa lan duduhe racaké bening.
  • Mangut. Bahan dhasar masakan iki arupa iwak panggang “Pé”, ya iku sajinis iwak pari yang diproses kanthi pengasapan nganggo kayu mirunggan saéngga ngasilaké aroma sing kas. Paling sedhep dicampur témpé lan lombok ijo terus dibumboni lan digodhok nganggo santen. Saliyané dimasak mangut, panggang iwak “Pé” uga énak dipenyèt nganggo sambel trasi.
  • Tahu Lonthong. Tahu Lontong Blora (nèng tlatah liya asring dijenengké Lontong Tahu), pancèn mirasa tenan. Tahu digorèng setengah mateng terus dipress nganggo piring supaya banyune tahu ilang. Banjur tahu ditumpangké sandhuwuring lontong, njur disiram nganggo bumbu kacang kécap. Ning ndhuwuré maněh di wur-wuri kacang lan brambang gorèng. Sing kawentar ning Blora ya iku Tahu Lontong Yu Tun sing dhasar ing Depot Gajah, Alun alun Blora. Ing kutha-kutha liya uga ana sawetara sing dodol Tahu Lontong Blora, kaya ta ing Semarang Tahu Lontong Blora mas Aris ing dalan Citarum. Ing Jakarta ana Tahu Lontong / Sate Blora Agus sing bukak warung ning Klender lan Sate Blora Kalibata ing plataran TMP Kalibata. Yèn ing kutha Yogyakarta uga ana Tahu Lontong Blora Bu Puji sing bukak warung ning Baciro.
Lembarang (Rahasia Resep Ibu Poeryoto Ngawén Blora)
  • Lembarang. Lembarang mono éwoning janganan / sayuran sing bahan bakune iwak pitik / daging ayam. Bahan : Daging ayam, tewel, labusiem, lombok abang sakcukupe, brambang, bawang, tumbar, kunir, uyah, godong sereh, godong jeruk, santen, kemiri lan laos. Cara masaké: Bumbu-bumbu diulek nganti alus, saliyané godong serèh, godong jeruk, laos lan santen. Sawisé alus, nembé digongsèng nganggo lenga gorèng nganti mambu wangi. Daging ayam / Sayuran dicemplungké sawisé sauntara wektu, nembé dijogi santen. Sawisé daging ayamé empuk, nembé bisa di hidangké.[12]
  • Jajanan. Saliyané saté lan Soto, akèh panganan utawa jajanan kas Blora antarané: sangkolun, godrès, gandhos, iwel-iwel, moho, thathakriyak, dumbeg, pasung, cempura, horog-horog, grontol, gendar, gemblong, gendar, untir-untir, lepet jagung.
  • Ombènan. Limun kawis, legèn, wédang cemoè.
  • Woh-wohan. Siwalan, Mindhik, Juwet, Jambu Ménté.
  • Janganan. Krai, Plonco utawa Gendhoyo, Temu Kunci.
  • Krupuk Sarmiyer (Samiler). di gawé soko puhung, diprodhuksi paling akèh ana ing désa Wantilgung Kacamatan Ngawén. racaké diiderne gawé pikulan nyampek Suroboyo, Semarang, Malang lan liya-liyané. nanging paling akèh diiderne ana ing Suroboyo.

Jarak Antarané Kutha krajan Kacamatan ing Kabupatèn Blora (KM)

Kacamatan Jati Randublatung Kradenan Kedungtuban Cepu Sambong Jiken Bagareja Jepon Blora Banjarejo Tunjungan Japah Ngawén Kunduran Todanan
Jati 12 KM 21 KM 26 KM 38 KM 44 KM 53 KM 58 KM 49 KM 43 KM 47 KM 50 KM 43 KM 34 KM 22 KM 38 KM
Randublatung 12 KM 9 KM 14 KM 26 KM 32 KM 41 KM 46 KM 37 KM 29 KM 35 KM 38 KM 50 KM 53KM 34 KM 50 KM
Kradenan 21 KM 9 KM 12 KM 24 KM 30 KM 50 KM 55 KM 46 KM 38 KM 44 KM 47 KM 59 KM 50 KM 43 KM 59 KM
Kedungtuban 26 KM 14 KM 12 KM 12 KM 18 KM 34 KM 47 KM 38 KM 43 KM 49 KM 52 KM 64 KM 55 KM 48 KM 64 KM
Cepu 38 KM 26 KM 24 KM 12 KM 6 KM 22 KM 35 KM 26 KM 34 KM 46 KM 43 KM 55 KM 46 KM 58 KM 74 KM
Sambong 44 KM 32 KM 30 KM 18 KM 16 KM 16 KM 29 KM 20 KM 28 KM 40 KM 37 KM 49 KM 40 KM 52 KM 68 KM
Jiken 53 KM 41 KM 50 KM 34 KM 22 KM 16 KM 13 KM 4 KM 13 KM 24 KM 21 KM 33 KM 24 KM 36 KM 52 KM
Bagareja 58 KM 46 KM 55 KM 47 KM 35 KM 29 KM 13 KM 9 KM 17 KM 9 KM 29 KM 38 KM 29 KM 41 KM 57 KM
Jepon 49 KM 37 KM 46 KM 38 KM 26 KM 20 KM 4 KM 9 KM 8 KM 20 KM 17 KM 29 KM 20 KM 32KM 48 KM
Blora 43 KM 29 KM 38 KM 43 KM 34 KM 28 KM 13 KM 17 KM 8 KM 12 KM 9 KM 21 KM 12 KM 24 KM 40 KM
Banjarejo 47 KM 35 KM 44 KM 49 KM 46 KM 40 KM 24 KM 9 KM 20 KM 12 KM 21 KM 15 KM 6 KM 18 KM 34 KM
Tunjungan 50 KM 38 KM 47 KM 52 KM 43 KM 27 KM 21 KM 29 KM 17 KM 9 KM 21 KM 22 KM 13 KM 25 KM 41 KM
Japah 43 KM 50 KM 59 KM 64 KM 55 KM 49 KM 33 KM 38 KM 29 KM 21 KM 15 KM 22 KM 9 KM 21 KM 13 KM
Ngawén 34 KM 41 KM 50 KM 55 KM 46 KM 40 KM 24 KM 29 KM 20 KM 12 KM 6 KM 13 KM 9 KM 12 KM 28 KM
Kunduran 22 KM 34 KM 43 KM 48 KM 58 KM 52 KM 36 KM 41 KM 32 KM 24 KM 18 KM 25 KM 21 KM 12 KM 16 KM
Todanan 38 KM 50 KM 59 KM 64 KM 74 KM 68 KM 52 KM 57 KM 48 KM 40 KM 34 KM 41 KM 13 KM 28 KM 16 KM

Plesiran

  • Guwa Terawang. Guwa Terawang minangka obyèk wisata alam, dumadi saka endapan watu gamping (limestone), Pegunungan Kendheng Utara sing umuré udakara 11 yuta taun. Dumunung ana ing Désa Kedhungwungu, Keacamatan Todanan, tlatah alas KPH Blora, kurang luwih 35 km sisih kuloné Kutho Blora. Guwa Terawang dawané kurang luwih 180 mèter lan jeroné 5-11 mèter ing ngisor lemah. Ing njeroné ana stalagmit lan stalagtit sing nyata éndah. Ing tlatah iki uga ana sawetara guwa liyané ya iku Guwa Kidang, Guwa Suru, Guwa Manuk lan sapunanggalané.
Goa Terawang
  • Waduk Bentolo. Waduk Bentolo dumunung ora pati adoh saka lokasi Guwa Terawang, ya iku ing Kacamatan Todanan. Waduk Bentolo minangka sumber irigasi kanggo sawah-sawah ing tlatah saubengé. Saliyané iku Waduk Bentolo uga dadi salah sawijiné obyek wisata lan lokasi Bumi Perkemahan Pancasona.
  • Waduk Tempuran. Waduk Tempuran minangka sarana irigasi, wisata alam lan sarana pembinaan ulah raga dayung. Masarakat saubengé uga nggunakaké Waduk Tempuran kanggo budidaya iwak karamba. Waduk iki dumunung kurang luwih 10 km sisih lor étane Kutha Blora.
  • Waduk Grènèng. Waduk Grènèng ambané udakara 45 ha, dumunung ana ing Kacamatan Tunjungan, kurang luwih 12 km lor kuloné Kutha Blora. Saliyané kanggo irigasi, waduk iki uga duwé fungsi kanggo miara iwak, pemancingan lan minangka obyèk wisata
    Gambar Loko Tour Cepu Sumber saka: http://www.blorakab.go.id/04_walam.php
  • Loko Tour. Loko Tur ngrupaaké pakèt wisata lelampahan kia-kira patang jam ing alas Cepu Blora nganggo sepur sing digèrèt lokomotip tuwa gawéan Berliner Maschinnenbaun Jerman taun 1928.
  • Pemandian Sayuran. Pemandian Sayuran dumunung kurang luwih 14 km lor étané Kutha Blora. Sesawangan saka tlatah iki pancèn éndah lan hawané seger amarga kalebu tlatah pagunungan. Pemandian Sayuran uga dilengkapi pemandian kanggo anak-anak lan padhépokan kanggo para wisatawan.
  • Agro Wisata Temanjang. Obyek wisata iki dumunung ana ng tlatah alas jati 16 km kidulé Kutha Blora. Laladan iki kawentar ana sawijining obyek wisata Dungmandur, arupa kedhung sing ora tau sat banyuné lan dikubengi déning sakèhé wit-witan. Ing obyek wisata Temanjang kéné uga ana panggonan kanggo nginep utawa tetirah.
  • Obyek Wisata Gunung Manggir. Arupa wisata alam pagunungan sing dumunung ing pebukitan Manggir, désa Ngumbul, Kacamatan Todanan, udakara 38 km kuloné Guwa Terawang. Kayadéné Guwa Terawang, obyèk Gunung Manggir iki uga duwé guwa sing njeroné ana stalagtit stalagmit-é. Sak loré Guwa Manggir ana manèh Guwa Mangklih sing njeroné ana sendhangé.
  • Obyek Wisata Géologi. Wisata Géologi ya iku wisata alam utawa wisata ngèlmu kebumian kanthi obyek sing magepokan karo prosès géologi, contoné lenga patra lan gas bumi. Ing tlatah Kabupatèn Blora akèh sumur lenga patra sing diketemoaké déning BPM ing taun 1890. Saka kurang luwih 648 sumur mau 112 sumur isih ngasilaké lenga patra. Nganti saiki isih akèh sumur lenga patra tuwa sing di budidayaaké déning warga kanthi cara tradisional.
  • Taman Budaya lan Seni Tirtonadi. Sawijining taman rekreasi ing tengah kutha Blora kang sanajan cilik nanging pepak saranané kaya ta bèji kanggo diwasa lan bocah cilik, panggung panglipur, kurungan manuk lan liya liyané. Taman Tirtonadi iki jaman biyèn tau dadi Kebun Kéwan sing ramé ditekani kulawarga, bocah-bocah cilik lan rumaja.
Taman Rekreasi Tirtonadi Blora

Tokoh asal Blora

Uga delengen

Réferènsi

  1. ↑ Sejarah Kabupatèn Blora
  2. ↑ Gambaran umum wewengkon Blora
  3. ↑ Kahanan geografis Blora
  4. ↑ Nama-nama Bupati di Kabupatèn Blora, basukiwidodo.blogspot.com. Diaksès 28 Oktober 2011.
  5. ↑ Seni Tayub
  6. ↑ Tayuban
  7. ↑ Seni Tayub
  8. ↑ Kehidupan Seni Tayub
  9. ↑ Seni Barong
  10. ↑ Wayang Krucil
  11. ↑ a b Sejarah Samin
  12. ↑ Resep masakan ing Situs ILUSA
  13. ↑ Leonardus Benjamin Moerdani
  14. ↑ Iwan Tirta
  15. ↑ Luluk Hadiyanto ing Wikipedia Basa Indonésia
  16. ↑ Luluk Hadiyanto ing Wikipedia Basa Inggris
  17. ↑ Denmark Open 2004
  18. ↑ China Open 2005 Luluk HADIYANTO/Yulianto ALVEN, INA (3) - Thomas LAYBOURN/Peter STEFFENSEN, DEN 15-12, 15-13
  19. ↑ Suara Merdeka:Luluk/Alven dan Nova/Lilyana Juara

Pranala njaba

Dijupuk saka "https://jv.wikipedia.org/w/index.php?title=Kabupatèn_Blora&oldid=1294834"