Antaséna

Antasena

Antaséna utawa uga sinebut Anantaséna. Teges tembung ananta ya iku tanpa wates déné sena ya iku njaga, nguwasani, kang mimpin.

Ing pedhalangan gagrag Jogjakarta, Antaséna iku anak ragilé Bima/Werkodara. Ibuné Dèwi Urangayu, putriné Hyang Mintuna (déwaning iwak ing banyu tawa) ing Kisiknarmada (muarané Gangga karo Serayu). Wiwit lair urip bareng karo ibu lan éyangé. Ing gagrag Surakarta, Antaséna iku asma liyané Antareja (anak pembarepe Werkudara).

Ing wayang, Antaséna iku kasatriyané ing Selamirah iya Randhugumbala. Garwané sesilih Dèwi Jenakawati, putriné Janaka/Arjuna. Satriya iki uga raket karo wuragilé Arjuna, Wisanggeni.

Antaséna ora naté gelem nganggo basa krama, jujur, prasaja, lan kendel. Gandhèng ibuné urang, awaké kebak sisik kang ora mempan déning gaman. Kadigdayané ana ing sungut mawa upas kang mapan ana sangisoré irung karan sungut upas warayang lan pengantèn lan nduwé aji-aji Cupu Maduséna sing bisa nguripaké wong kang mati ing njaba takdiré.

Nalika Perang Baratayudha arep diwiwiti, Antaséna ngadhep Sanghyang Wenang. Sanghyang Wenang sabda yèn Antaséna kepengin Pandhawa menang, satriya iki kudu ora mèlu perang. Antaséna nyaguhi kekarepané déwa. Sanghyang Wenang njaluk supaya Antaséna ndeleng netrané. Suwé-suwé awaké Antaséna dadi cilik lan banjur muksa.

Uga delengen

• Dhaptar paraga wayang

Pranala njaba

• (ing basa Indonésia) Situs buku asesirah 'Antareja Antasena: Jalan Kematian Para Ksatria'
• (ing basa Indonésia) Antasena, Jalan Manusia Sufi
• (ing basa Indonésia) Antasena ing Bausastra Javanese Dictionary (bausastra.com)