Melilla

Melilla iku eksklave duwèké Spanyol ing Mediterania kang amba wewengkoné 12,3 km², dumunung ing pesisir lor Afrika Lor lan diubengi déning wewengkoné Maroko. Melilla lan Ceuta iku loro wewengkon Spanyol ana ing dharatan bawana Afrika. Kutha iki minangka bagéyan saka propinsi Málaga nganti 14 Maret 1995, banjur sawisé éntuk Status Otonomi.

Melilla (lan Ceuta) minangka plabuan bébas sadurungé Spanyol dadi anggota Uni Éropah. Miturut cacah taun 2008, padunungé ana 73.460 jiwa. Kutha iki nduwèni padunung kang agamané Kristen, Muslim (utamané wong Berber), lan Yahudi (minoritas). Basa Spanyol minangka basa resmi masarakat, nanging sawijining dialèk basa lokal (basa Riff Berber) uga umum dipigunakaké.