Kapuloan Natuna Besar

Saka Wikipédia Jawa, bauwarna mardika basa Jawa
Kapuloan Natuna Besar
Peta Kapuloan Natuna Besar

Kapuloan Natuna Besar inggih punika salah satunggaling pulo ing Indonésia, mlebet wewengkon pamaréntahan Provinsi Kapuloan Riau, Indonésia. Kapuloan Natuna Besar taksih kalebet péranganing Kapuloan Natuna, salah satunggaling kapuloan ing sisih paling nginggil ing Indonésia. Ambanipun dharatan wonten ing Kapuloan Natuna Besar inggih kirang langkung 1.720 km².

Pulo paling lor saking kapuloan punika inggih Pulo Laut (Natuna).

Pulo Bunguran inggih pulo ingkang utami ing Kapuloan Natuna Besar. Pulo Bunguran inggih pulo kanggé papan panggenannipun tiga jinis primata non-manungsa: loris lambat (Nycticebus coucang), makaka buntut panjang (Macaca fascicularis), lan monyet daun natuna (atau surili paha putih, Presbytis natunae).[1][2]

Géografi[besut | besut sumber]

Kapuloan Natuna Besar mapan wonten ing tengah-tengahing nagara sanès, inggih punika nagara Malaysia inggih Malaysia Barat saha Malyasia Timur. Papan lokasi kapuloan Natuna Besar ingkang kalebet gugusan Kapuloan Natuna punika ingkang dadosaken kathah tiyang ingkang lepat anggènipun ningali ing peta lan kathah ingkang ngira-ira manawi kapuloan Natuna Besar punika mlebet wewengkon Malaysia. nanging sajatosipun kapuloan Natuna Besar taksih mlebet wewengkon Indonésia. Wonten ing kapuloan Natuna Besar mapan kutha krajan Natuna inggih punika kitha Ranai. Ing kapuloan Natuna Besar wonten 6 wewengkon kacamatan, inggih punika Bunguran Timur, Bunguran Barat, Bunguran Selatan, Bunguran Utara, Bunguran Tengah, ngantos Bunguran Timur Laut. Kitha Ranai ing kapuloan Natuna Besar utawi ingkang asring dipunsebat Pulo Bunguran punika papan letakipun persis wonten ing pinggiring laut. Nanging sanajan mapan wonten ing pinggir laut, kitha Ranai ugi dipunlindhungi kaliyan wontenipun gunung ingkang boten tebih saking laut, jarakipun kirang langkung namung 5 kilomèter saking gigiring pasisir. Kanthi wontenipun gunung punika, masarakat ing kitha Ranai saged ngraos langkung aman manawi wonten malabaya saking laut kados tsunami.[3]

Transportasi[besut | besut sumber]

Posisi Natuna namung kados titik ing salebeting bunderan amargi jarakipun ingkang tebih sanget saking pulo-pulo sanès ingkang mapan wonten ing sebrang, kados Malaysia ing sisih wétan saha sisih kulon, Vietnam ing sisih lor ipun, saha Pulo Batam ing sisih kidulipun. Nanging ewa samanten, manawi badhé dugi dhateng kapuloan Natuna Besar punika sampun wonten transportasi ingkang radi gampil kanggé mlebet saha medal pulo punika. Sapérangan montor mabur sampun radi kathah ingkang landas wonten ing papan anggegana ing kapuloan Natuna Besar sanajan papan anggegananipun taksih ngampil saking TNI Angkatan Udara. Déné, manawi badhé ngginakaken transportasi laut ugi sampun wonten sapérangan kapal-kapal ageng ingkang asring mampir ing kapuloan punika, kados kapal Bukit Raya gadhahipun Pelni, Sabuk Nusantara, saha Kapal Perintis. Kapal-kapal kasebat mampir ing kapuloan Natuna Besar sapisan saben peken.

Cathetan suku[besut | besut sumber]

  1. Lammertink, Nijman, and Setiorini, 2003. Oryx 37(4):472-479
  2. Brandon-Jones et al. 2004. Asian Primate Classification. International Journal of Primatology 25(1):97-164.
  3. [1] Archived 2012-12-31 at the Wayback Machine. Natuna, Dari Biaya Hidup yang Tinggih Hingga Kota Modern di Atas Laut (dipunundhuh tanggal 5 Januari 2013)

Koordhinat: 3°56′52.930″N 108°12′45.306″E / 3.94803611°N 108.21258500°E / 3.94803611; 108.21258500