Jogja Bay
| Jogja Bay Waterpark | |
|---|---|
| Dumunung ing tlatah | Ngayogyakarta, Daérah Istiméwa Yogyakarta, Indonésia |
| Alamat | Dalan Lor Stadhiyon, Maguwaharja, Dhépok, Sléman, Daérah Istiméwa Yogyakarta 55281 |
| Situs web | www |
| Kabukak | 20 Dhésèmber 2015 |
| Jembar | 19 acres (7.7 ha) |
Jogja Bay Waterpark utawa Jogja Bay (basa Jawa: ꦠꦼꦭꦸꦏ꧀ꦔꦪꦺꦴꦒꦾ 'Teluk Ngayogya') yaiku salah sawijining taman wisata tirta utawa waterpark gedhé ing Asia Kidul-Wétan kang prenahé ana ing Ngayogyakarta, Indonésia. Taman wisata tirta iki dibuka sacara resmi ing 20 Dhésèmber 2015.
Prenah[besut | besut sumber]
Jogja Bay mapan ini Daérah Istiméwa Yogyakarta, mligi ing Dalan Lor Stadhiyon, Maguwaharja, Dhépok, Sléman, Daérah Istiméwa Ngayogyakarta 55281. Taman tirta iki ambané udakara 7,7 héktar, wondéné 5 héktar iku minangka laladan utama lan 2,7 héktar minangka laladan ijo lan papan parkir.[1][2][3][4]
Téma[besut | besut sumber]
Konsèp kang diusung Jogja Bay yaiku campuran antarané tradhisi Ngayogya lan paraga bajag laut Éropa.[2] Jogja Bay Waterpark mligi macak saèmper kaya kampung lawas bajag laut kanthi swasana Tropical Lust kang dikebaki klawan tetanduran ijo. Taman wisata tirta iki karesmèkaké déning Gubernur Daérah Istiméwa Ngayogyakarta, Sri Sultan Hamengkubuwana X ing 20 Dhésèmber 2015.[4][5]
Wahana[besut | besut sumber]
Wahana Jogja Bay kacawisaké mligi kanggo dolanan lan uga piwulang. Plancong bakalé bisa ngrasakaké wahana campuran antarané lindhu lan tsunami. Paling ora wis ana 8 ombak gedhé kang cumawis ing papan iki.[1][5]
Musiyum Water for Life[besut | besut sumber]
Musiyum iki medharaké babagan banyu lan pigunané. Para plancong bisa nlusuri 13 scene kang ana sajroning Musiyum Banyu "Water of Life" kanthi nyusuri dhiorama bab banyu, pigunané, uga tuwuh rembakaning kawruh bab banyu. Dhiorama iku mau awujud alas udan tropis, laladan sawahan, pasisir, indhustri, anatomi, lan jagat ngisor sagara. Saliyané iku, musiyum iki uga medharaké sajarah dawa ngenani Selokan Mataram, yaiku sawijining kalènan gedhé ing Ngayogyakarta. Rega karcis kanggo lumebu menyang musiyum iki yaiku Rp. 15 èwu/wong.
Memo Racer[besut | besut sumber]
Wahana prosotan banyu kang dhuwuré 20 mèter lan dawané 89 mèter iki kadadèn saka 8 dlujur. Plancong bisa nyoba prosotan iki bebarengan karo kanca utawa kulawargané kanggo dhisik-dhisikan mrosot.
Bekti Adventure[besut | besut sumber]
Wahana iki kacawisaké tumrap para plancong kang kepéngin ngubengi aréa Jogja Bay migunakaké blabag luncur. Bekti Adventure bisa ditumpaki klawan paling sithik telung wong lan paling akèh patang wong nalika sak pisan ubengan. Bekti iku minangka aran pangarsané prajurit kraton kang bakalé nggawa para plancong ngubengi Jogja Bay ngliwati slider kang ménggok lan mubeng.
Volcano Coaster[besut | besut sumber]
Wahana prosotan banyu iki wujudé saèmper kaya roller coaster. Para plancong bisa mrosot kanthi banter lan tundhoné mandheg ing kali Jogja Bay, saéngga plancong bisa ngrasakaké kolam ombak kang gegayutan langsung.
Timo-Timo Rider[besut | besut sumber]
Wahana iki dhuwuré 14 mèter, dawané dlujur 116 mèter, lan dlujurané kadadèn saka 3 ubengan. Para plancong bisa nyoba lan ngrasakaké saèmper kaya diontang-anting ing sagara.
Jolie Raft River[besut | besut sumber]
Wahana prosotan banyu iki dhuwuré 14 mèter klawan ombak alon kang bisa nggawa para plancong lumaku kèli bareng ilèning banyu kanthi ngliwati dlujur kang dawané 140 mèter.
Brando Boomeranggo[besut | besut sumber]
Wahana kang dhuwuré 13,5 mèter iki nduwèni dlujur kang katutup lan ménggak-ménggok. Para plancong bakal mrosot banter ngliwati trowongan blackhole kang dawané 72 mèter. Ing pucuké dlujur mau ana blabag kang mligi kacawisaké amrih krasa sénsasi kepental lan ngrasakaké dadi bumerang ing pungkasané dlujur. Wahana iki tundhoné ana ing kali Jogja Bay, saéngga plancong bisa ngrasakaké kolam ombak.
Ziggy Giant Barrel[besut | besut sumber]
Wahana kanthi ikon utamané wujud èmbèr raseksa cacah loro iki kadadèn saka sawetara prosotan cendhak lan nduwèni blabag dlujur kang ora pati gedhé. Ana barèl gedhé ing pérangan dhuwur kang kaisi banyu kanthi otomatis. Nalika barel wis kaisi kebak, banjur banyu bakalé numplak mudhun, lan para plancong bisa ngrasakaké gebyuran banyu.
South Beach[besut | besut sumber]
South Beach awujud kolam gedhé mawa ombak ing wayah-wayah tartamtu. Wahana iki nduwèni 7 warna ombak kang saèmper kaya swasana pasisir tenanan, yaiku mawa gulungan ombak kang gedhé. Para plancong bisa ngrasakaké ombak South Beach mawa fasilitas ban kang cumawis kanthi lelahanan utawa gratis ing aréa wahana iku mau.
Ombak South Beach bakal gumulung saben sak jam saben dinané. Kanthi amba 1.544 mèter pesagi lan jero pucuking karang 1,6 mèter, wahana iki bisa ngamot éwonan wong kang kepéngin ngrasakaké gulungan ombak wanci ésuk, awan, apa déné soré. Para plancong bisa ngrasakaké ombak-ombak gedhé kang saèmper kaya tsunami kang tekané sewayah-wayah ora dinyana-nyana.
Kula Playpool[besut | besut sumber]
Wahana iki bisa ngamot 300 wong lan klawan jeron 0,8 nganti 1,5 mèter iki uga cumawis ring baskèt ing aréa kolam. Para plancong bisa migunakaké fasilitas dolanan iki kanthi lelahanan utawa gratis. Para plancong uga bisa nglangi ing wahana iki sinambi nyicipi pasugatan ing Pool Bar kang cumawis ana sacerakaé Kula Playpool.
Donte Wild River[besut | besut sumber]
Wahana mawa ilèn kang anteng iki cumawis kanggoné para plancong kang kepéngin nyoba kèli banyu kanthi swasana kang éyup kaya déné nyusur ing kali kang sadawané 355 mèter. Kanthi jero kolam 0,8 mèter lan ilèn kang ora pati banter, para plancong bisa ngèli sinambi ngrungokaké swaraning manuk lan uga sumiliré angin kang saèmper kaya ngèli ing kali tenanan.
Mimi Family[besut | besut sumber]
Wahana wujud kolam renang cilik mawa telung prosotan iki cocog kanggo para plancong kang kepéngin ngrasakaké swasana lan lèyèh-lèyèh. Papan iki uga cocog kanggo bocah jalaran kolamé ora pati jero, yaiku udakara jeroné namung 0,4 mèter. Ing prosotan sisih tengah, para plancong bisa mrosot bebarengan karo bathih utawa kanca-kancané. Ambané slider iki bisa ngamot papat nganti limang wong kang kepéngin prosotan bebarengan.
Hip Playground[besut | besut sumber]
Wahana mawa wujud warna-warni iki nduwèni trowongan banyu kanthi ili kang ora pati banter. Saliyané iku, uga cumawis prosotan mligi kanggo bayi kang umuré sangisoré limang taun. Prosotan iki kagolong aman kanthi pangawasan saka wong tuwa. Ing aréa wahana iki uga cumawis parasol lan bangku kang bisa digunakaké kanggo ngéyup kanthi gratis. Prenahé wahana iki cerak karo Gili-Gili Resto kang bisa digunakaké kanggo wisata kulinèran.
The Harbour Theatre[besut | besut sumber]
The Harbour Theatre nduwèni tribun kang bisa ngamot penonton nganti 2000 wong. Panggung iki kaprenah caket ing sisih ngiringané Pirates Ship kang minangka ikon Bajag Laut Jogja Bay Waterpark. The Harbour Theatre Jogja Bay Waterpark macak tontonan arupa ikon karnaval ing saben dina Setu lan Minggu kang diwiwiti jam 3 soré. Saliyané iku ing saben Minggu jam 2 awan uga kagelar Spectaculer Show drama musikal asesirah “Jose and The Guardians” kang medharaké crita bab Jogja Bay.
Toko lan warung[besut | besut sumber]
Saliyané ana pirang-pirang wahana, para plancong uga bisa tuku suvenir utawa olèh-olèh ing Jogja Bay Store kang awujud kapal bajag laut gedhé. Ing laladan Jogja Bay uga ana pirang-pirang réstoran kang adol manéka warna panganan kaya ta Freid Chicken, BBQ, panganan western, pangananan Indonésia, ès krim, cemilan, lan sapanunggalané.[2]
Kruger Corner[besut | besut sumber]
Papan éyup mawa pirang-pirang bangku kayu iki minangka papan kanggo ngudud lan snack place kang cumawis tumrap para plancong kang kepéngin lèyèh-lèyèh. Papan iki kaprenah ing sakidulé wahana Brando Boomeranggo, saéngga kang mampir uga tetep bisa ndeleng swasana Jogja Bay Waterpark.
Lawana Resto[besut | besut sumber]
Aréa résto kang mligii nyawisaké panganan kas kulinèr Nuswantara iki kaprenah ing sisih kidulé wahana Memo Racer. Papan mawa rong lampit iki bisa ngamot 100 wong. Saka lampit dhuwur, para plancong bisa ngrasakaké swasana kanthi sesawangan wahana Jogja Bay ing antarané yaiku Memo Racer, South Beach, lan Donte Wild River. Mligi ing lampit kaping loro uga ana smoking room area kanggoné para plancong kang kepéngin ngudud.
Jogja Bay Fried Chicken[besut | besut sumber]
Jogja Bay Fried Chicken iku résto kang mligi nyawisaké fast food.
Gili-Gili Resto[besut | besut sumber]
Gili-Gili Resto nyawisaké kulinèr barbeque lan manéka panganan western kaya ta pizza, ayam bakar, iwak bakar, lan sapanunggalané. Résto mawa rong lampit iki kaprenah ana sisih wétan wahana Hip Playground. Ing lampit kaping loro, para plancong bisa ngrasakaké olahan barbeque sinambi nyawang swasana kang ana ing Jogja Bay Waterpark sisih kidul.
Rega karcis[besut | besut sumber]
Rega karcis kanggo lumebu menyang Jogja Bay yaiku Rp. 90 èwu wanci weekday lan Rp. 100 èwu ing wanci weekend kanggoné wong diwasa. Wondéné rega kanggo bocah yaiku Rp. 60 èwu nalika weekday lan Rp. 75 èwu nalika weekend.[2]
Deleng uga[besut | besut sumber]
Rujukan[besut | besut sumber]
- ↑ a b "Jogja Bay Waterpark". www.jogjabay.com. Diarsip saka sing asli ing 2020-06-03. Dibukak ing 2020-06-03.
- ↑ a b c d Rizky (2018-11-06). "Jogja Bay, Tujuan Wisata Keluarga Dengan Beragam Wahana". NativeIndonesia.com (ing basa Inggris Amérika Sarékat). Dibukak ing 2020-06-03.
- ↑ "14 Spot Foto Keren di Jogja Bay Waterpark yang Lagi Hits 2019 - Eksotis Jogja". Eksotisjogja.com (ing basa Indonesia). 2017-07-07. Diarsip saka sing asli ing 2020-09-22. Dibukak ing 2020-06-03.
- ↑ a b "10 Gambar Jogja Bay 2020 Harga Tiket Masuk Lokasi Alamat Wisata Waterpark Pirates Yogyakarta" (ing basa Indonesia). Dibukak ing 2020-06-03.
- ↑ a b Saputra, Ginanjar (2019-11-21). "Inilah 19 Wahana & Fasilitas di Jogja Bay Waterpark". Solopos.com (ing basa Indonesia). Dibukak ing 2020-06-03.