Jennifer Lawrence

Saka Wikipédia Jawa, bauwarna mardika basa Jawa

Jennifer Shrader Lawrence (Lair 15 Agustus 1990) iku aktris Amérika. Lair lan diopèni ing Louisville, Kentucky, dhèwèké wis dititèni déning juru golèk bakat ing kutha New York City nalika umur 14 taun. Dhèwèké agé-agé ngalih menyang Los Angeles lan miiwiti karir èktingé kanthi ndhapuk dadi paraga tamu ing acara tipi. Rol utama kapisané iku dadi anggota paraga baku ing kumedhi swasana The Bill Engvall Show (2007–2009). Dhèwèké gawé dhebut nalika dadi paraga pandhukung ing filem Garden Party (2008), banjur saya kondhang saka paragané sing dialem nalika dadi nom-noman mlarat ing drama swatantra Winter's Bone (2010).

Lawrence nrima pangakon kang luwih akèh nalika ndhapuk dadi mutan ajeneng Mystique ing filem X-Men: First Class (2011), rol iki sing diparagakaké ing pérangan waralaba X-Men sak lebaré. Paraga bintangé dadi Katniss Everdeen ing seri filem Hunger Games (2012–2015) ngukuhaké dhèwèké dadi wirawati sing brutoné gedhé dhéwé ing salawasing jaman. Lawrence wis nglumpukaké sawenèh kanugrahan saka kolaborasiné karo sutradhara David O. Russell. Dhèwèké kanugrahan Academy Award tumrap Aktris Apik Dhéwé. Kanugrahan iki ditrima amarga dhapukané dadi randha sing dhèprèsi ing kumedhi asmara ajudhul Silver Linings Playbook (2012), lan njalari dhèwèké dadi juwara Oscar Aktris Apik Dhéwé Paling Enom Kapindho. Dhèwèké uga nrima BAFTA Award tumrap Aktris Apik Dhéwé nalika dadi paraga pandhukung kang maragakaké setri sing wiyoga ing kumedhi ila-ila American Hustle (2013). Dhèwèké uga menang telung Golden Globe Awards saka paragané ing filem sing mau mau lan mbintangi invèntor ing filem biografi asesirah Joy (2015).

Lawrence wis dadi sawijining aktris sing paling dhuwur bayarané lan paling suksès ing donya déné filemé brutoné punjul $5 milyar AS ing sadonya tekan sapréné. Dhewèké iku aktris sing paling enom sing wis tau éntuk papat nominasi Academy Award. Lawrence panyengkuyung tumrap fèminisme lan samyaning jènder. Dhewèké uga widhiyakaning Jennifer Lawrence Foundation. Sarana yayasan iku, dhèwèké nyengkuyung manéka warna organisasi amal.