Javanese Diaspora Event

Saka Wikipédia Jawa, bauwarna mardika basa Jawa

Javanese Diaspora Event dicekak JDE utawa mung Javanese Diaspora iku adicara karotengah taunan kang ancasé ngumpulaké wong Jawa saka saindengé donya ing Kutha Ngayogyakarta. Tekan sapréné, adicara iki wis ping telu diayahi, taun 2014, 2015, lan 2017. Sing ngadani ya iku Javanese Diaspora Network. Adicara iki kondhang awit irah-irahané "Ngumpulké Balung Pisah" (NBP) kang mangku karep ngumpulaké wong-wong Jawa kang padha mencar nanging padha nunggal jiwa ing memetri kabudayan Jawa, kadi déné balung-balung pisah kang satemené nunggal awak. JDE iku minangka pasamuwan kanggo rembugan ngenani tuwuh-tumengkaré lan tembé buriné kabudayan Jawa. Taun 2017, JDE diadani ing Kutha Ngayogyakarta.[1]

Panyarta kang ngèstrèni adicara iki teka saka njeron lan njaban rangkah Indonésia, mligi papan-papan dunungé wong Jawa ing njabané Pulo Jawa. Saka njeron rangkah, panyarta mligi teka saka Sumatra, Kalimantan, lan Sulawesi, déné saka njaban rangkah mligi saka Surinam, Nèderlan, Singgapur, Malaysia, lan Kalédhonia Anyar.

Sajarah[besut | besut sumber]

Gagasan ngenani JDE thukul saka Facebook. Kawitané, wong-wong Jawa saka manéka papan padha duwé grub dhéwé-dhéwé. Contoné, ana grub-grub wong Jawa Surinam, Kalédhonia Anyar, lan Walanda, samono uga wong Jawa Tondano, Lampung, lsp. Nalika taun 2007, kang mandhégani grub-grub iku padha nglumpuk ing sawiji grub Javanese Diaspora, kang dikepyakaké minangka paguyubané wong Jawa saka saindengé donya.[2]

Kagiyatan[besut | besut sumber]

Adicara iki pisanan diadani taun 2014 tanggal 15-16 Fèbruari ing Hotèl Merapi Merbabu, Yogyakarta. Nalika iku ngepasi njeblugé Gunung Kelud. Awuné tekan Yogyakarta lan njalari tutupé sawenèh papan anggegana ing Jawa, kalebu Papan Anggegana Adisucipto, uga wurungé sakèhé pamaburan. Ing taun iku, satusan panyarta saka Walanda, Surinam, lan Indonésia ngèstrèni adicara iki. Ing taun 2015, JDE II diadani tanggal 15-16 Agustus. Adicarané dièstrèni udakara wong 300 saka 14 nagara.[1]

Ing taun 2017, JDE III diadani tanggal 17-23 April ing Bètèng Vredeburg, Yogyakarta.[3] Manawa sadurungé JDE dikemunah mligi déning Javanese Diaspora Network, JDE III uga disengkuyung déning pamaréntah Yogyakarta kang diwakili Dinas Kebudayaan DIY.[4]

Basa kang dianggo ing JDE iku basa Jawa ngoko minangka basa kang dingertèni wong Jawa saka manéka papan lan basa Inggris.[3]

Rujukan[besut | besut sumber]

  1. a b "Diaspora Jawa se Dunia Bakal Kumpul Lagi di Jogja". suaramerdeka.com. 14 Sèptèmber 2016. Diarsip saka sing asli ing 18 October 2016. Dibukak ing 16 April 2017.
  2. "Javanese Diaspora Event III "Ngumpulke Balung Pisah"". jogjatv.tv. 20 Maret 2017. Dibukak ing 16 April 2017.
  3. a b Cipasang, Yayat R. (15 April 2017). "Diaspora Jawa Akan Berkumpul di Yogyakarta". rilis.id. Diarsip saka sing asli ing 15 April 2017. Dibukak ing 16 April 2017.
  4. Aditya, Ivan (6 Januari 2017). "Ratusan Warga Keturunan Jawa dari 14 Negara akan Kumpul di Yogya". krjogja.com. Diarsip saka sing asli ing 8 January 2017. Dibukak ing 16 April 2017.

Pranala njaba[besut | besut sumber]