Harry Potter and the Order of the Phoenix (filem)

Saka Wikipédia Jawa, bauwarna mardika basa Jawa
Loncat ke navigasi Loncat ke pencarian
Harry Potter and the Order of the Phoenix (filem)
DisutradaraniDavid Yates
DiprodhuseriDavid Heyman
David Barron
Ditulis déningNovel:
Joanne Kathleen Rowling
Naskah:
Michael Goldenberg
DibintangiDaniel Radcliffe
Rupert Grint
Emma Watson
Ralph Fiennes
Michael Gambon
Gary Oldman
Imelda Staunton
DimusikiNicholas Hooper
Lagutema oleh:
John Williams
SinématografiSławomir Idziak
Dibesut déningMark Day
Dibabar déningWarner Bros.
Nagara Britania Raya
Bendera_Amerika Serikat Amerika Serikat
BasaBasa Inggris
RantamanGB£75 yuta (US$150 yuta)
KalarisanUS$938,468,864

Harry Potter lan Pakumpulan Phoenix utawa Harry Potter and the Order of the Phoenix yaiku filem taun 2007 kang nyritakaké lakoné Harry Potter kang adhedhasar novèl anggitané J. K. Rowling mawa irah-irahan kang saèmper uga. Filem iki kaarahaké déning David Yates lan narasiné rinumpaka déning Michael Goldenberg.

Laku carita[besut | besut sumber]

Akèh-akèhé wong ing jagat sihir lan uga kemantrèn sihir ora percaya klawan bangkité Voldemort. Wong-wong padha ngarani manawa Harry lan Dumbledore iku rada owah pikiré lan diarani mung nyebaraké kabar goroh bab bangkité Voldemort iku mau. Sanajan kaya mangkono, isih ana wong kang padha percaya tumrap Dumbledore, nuli wong-wong iku mau kang padha nyawiji ing Pakumpulan Phoenix. Jalaran kahanan kang sarwa gègèran, mula pakumpulan iku mau padha makarya meneng-menengan amrih ora konangan Kamantrèn Sihir. Pakumpulan iki migunakaké omahé Sirius aran Grimmauld Place nomer 12 minangka markas, saéngga Sirius uga mapan ajeg ing kono (ajeg ndhelik jalaran kamantrèn isih mburu dhèwèké).[1]

Nalika iku Harry diawasi ketat déning anggotaning pakumpulan (klawan tanpa dikonangi Harry). Harry ing wektu iku saya kerep ngrasakaké lara ing tilas tatuné, lan émosiné kerep ora bisa dikendhalèni. Nuju sawijining wengi dhèwèké kagèt awit anané dementor ing Privet Drive kang karsa nyerang Harry lan Dudley. Begjané Harry kasil bisa ngetokaké patronus kanggo mrantas dementor-dementor iku mau. Nanging jalaran kadadéan iku mau uga dhèwèké mèh ditundhung pamané (amarga dikira kang nyerang Dudley), nuli Harry uga kudu ngadhepi sidang ing Kamantrèn Sihir lan diancem bakal ditokaké saka Hogwarts.[1]

Cekaking carita, kang dadi pucuking crita ing filem iki yaiku nalikané paprangan ing Kamantrèn Sihir. Harry dipancing amrih mara menyang Kamantrèn Sihir, awit ing papan kono wis ana para Panguntal Pati. Panguntal Pati iku padha sengaja njebak Harry supaya njipuk bal ramalané ing Dhépartemèn Misteri. Harry, Ron, Hermione, Luna, lan Neville padha ngupaya amrih slamet saka serangané para Panguntal Pati, sawetara para anggotaning Pakumpulan Phoenix padha teka kanggo nulungi Harry cs. Paprangan ramé ora bisa kacegah, kang tundhoné Sirius ndemahi pati lan Dumbledore teka kanggo nulungi Harry saka Voldemort. Sawisé perang tandhing antarané Dumbledore lan Voldemort, katon manawa Dumbledore iku luwih winasis. Ing pungkasané, Voldemort ngupaya kanggo nguwasani Harry, nanging upadayané ora kasil awit rasa tresnané Harry tumrap kanca-kancané lan swargi Sirius iku luwih kuwat. Fudge ngonangi Voldemort nalika dhèwèké arep ngilang. Mula mawa kadadèn iki mau, Kamantrèn Sihir gelem ora gelem kudu ngakoni manawa Voldemort iku wis bangkit manèh. Banjur Fudge dilègsèraké saka jabatané lan Umbridge ditokaké saka Hogwarts.[1]

Ing pungkasané carita, Dumbledore medharaké bab ramalan iku marang Harry. Ramalan iku mau sajatiné winedhar déning Profésor Trelawney, kang isiné yaiku kanggo rumeksa urip, antarané Harry lan Voldemort iku kudu padha patèn-patènan jalaran salah siji saka karoné iku ora bakal bisa urip yèn sing sijiné iku isih urip.[1]

Paraga[besut | besut sumber]

  • Daniel Radcliffe minangka Harry Potter
  • Rupert Grint minangka Ron Weasley, kancané Harry.
  • Emma Watson minangka Hermione Granger, kang uga minangka kancané Harry
  • Helena Bonham Carter minangka Bellatrix Lestrange
  • Robbie Coltrane minangka Rubeus Hagrid, manungsa separo buta lan kang mbaureksa Hogwarts, guru Ngèlmu Rumeksa saka Kéwan Liyar lan anggota Orde Phoenix.
  • Warwick Davis minangka Filius Flitwick, kepala griya asrama Ravenclaw.
  • Ralph Fiennes minangka Lord Voldemort, mungsuh Harry lan pangarsa Panguntal Pati.
  • Michael Gambon minangka Albus Dumbledore, kepala sekolah Hogwarts lan juru sihir paling winasis sajagad.
  • Brendan Gleeson minangka Mad-Eye Moody, mantan guru Ngèlmu Rumeksa saka Sihir Ireng lan anggota Orde Pheonix.
  • Richard Griffiths minangka Vernon Dursley, paman Muggle Harry.
  • Jason Isaacs minangka Lucius Malfoy, bapakné Draco Malfoy lan anggota Panguntal Pati sénior.
  • Gary Oldman minangka Sirius Black, bapak baptisé Harry lan anggota Orde.
  • Alan Rickman minangka Severus Snape, guru Jampi lan anggota Orde.
  • Fiona Shaw minangka Petunia Dursley, bibi Muggle Harry.
  • Maggie Smith minangka Minerva McGonagall, guru Transfigurasi lan anggota Orde.
  • Imelda Staunton minangka Dolores Umbridge, guru Ngèlmu Rumeksa saka Sihir Ireng kang anyar lan Insikutor Pangarsa Hogwarts, utusaning Kemantrèn Sihir.
  • David Thewlis minangka Remus Lupin, mantan guru Ngèlmu Rumeksa saka Sihir Ireng lan anggota Orde.
  • Emma Thompson minangka Sybill Trelawney, guru Ramalan.
  • Julie Walters minangka Molly Weasley, ibuné Ron lan anggota Orde.

Sèt dhisèn[besut | besut sumber]

Stuart Craig dadi juru rumpaka sèt manèh awit kang uga ngrumpaka sèt ing patang filem sadurungé. Ana sawetara sèt anyar kang wiwit muncul ing filem iki. Balé binuka jembar ing Kamantrèn Sihir kang dawané luwih saka 200 ft iku dadi sèt kang paling gedhé lan ngentèkaké béya paling larang ana sajroning séri filem Harry Potter.[2] Dhisèn kang rinumpaka déning Craig iku winasitan saka Setatsiyun Underground London rikala biyèn, yaiku kanthi mujudaké niru arsitèktur klasik nanging mawa jubin kramik. Dhisèn iki uga winasitan saka Burger King ing Tottenham Court Road ing London kang mujudaké fasad Victoria.[3][4] Banjur ing sèt Grimmauld Place iku ana prangwedani kulawarga Black kang sumebar ana ing telung témbok.[5] Sakabèhané sèt ing Hall of Prophecies utawa Balé Ramalan iku digawé mawa digital, kalebu babak nalikané paprangan ing jeron balé, nalikané bal ramalan tumiba ing lemah lan pecah, iku kabèh digawé mawa digital. Manawa sèt iku digawé mawa fisik, mangka bakal ngentèkaké wektu risèt kang suwé.[6]

Èfèk visual[besut | besut sumber]

Filem iki anggoné motrèt mbutuhaké luwih saka 1.400 èfèk visual, wondéné Double Negative sawijining kumpeni kang basisé ing London iku kang ngripta 950 èfèk iku mau. Double Negative makarya 6 sasi kang diwiwiti sasi Sèptèmber 2005 kanggo nggarap prévisualisasi Kamar Kabutuhan, Alas Larangan, Balé Ramalan, lan Kamar Pati.[7]

Sawijining karakter anyar ing filem iki yaiku Grawp, sedulur kuwaloné Hagrid kang wujud raseksa. Karakter iki digarap mawa téknologi anyar aran Soul Capturing kang dikembangaké déning Image Metrics. Obah lan ulating rai Grawp iku dijupuk saka rainé aktor Tony Maudsley.[7][8]

Deleng uga[besut | besut sumber]

Rujukan[besut | besut sumber]

  1. a b c d Harry Potter and the Order of the Phoenix (2007) - IMDb, dijupuk 2020-07-04 
  2. "New Interactive OotP Set Preview Photos on MSNBC". The-Leaky-Cauldron.org. 2007-02-09. Dijupuk 2020-06-25. 
  3. "Pottering about". The Northern Echo (ing basa Inggris). Dijupuk 2020-06-25. 
  4. "Harry Potter 5 Set Visit - Production Designer Stuart Craig". ComingSoon.net (ing basa Inggris). 2007-06-25. Dijupuk 2020-06-25. 
  5. ""Empire" Magazine Feature on OotP". The-Leaky-Cauldron.org. 2007-05-24. Dijupuk 2020-06-25. 
  6. "Harry Potter 5 Set Visit - The Sets". ComingSoon.net (ing basa Inggris). 2007-06-25. Dijupuk 2020-06-25. 
  7. a b "'Order of the Phoenix': Escalating 'Potter' VFX -- Part 1". Animation World Network (ing basa Inggris). Dijupuk 2020-06-25. 
  8. Waxman, Sharon (2006-10-15). "Cyberface: New Technology That Captures the Soul". The New York Times (ing basa Inggris). ISSN 0362-4331. Dijupuk 2020-06-25.