Gedhong Tilas Kawedanan Menès

Gedhong Tilas Kawedanan Menès (basa Indonésia: Gedung Bekas Kawedanan Menes) iku salah siji gedhong kolonial ing Provinsi Banten kang dinuga kayasa ing taun 1848. Gedhong iki kapernah ing Dalan Komplèk Cendana, Kalurahan Purwareja, Kacamatan Menès, Kabupatèn Pandéglang. Arsitèkturé gabungan arsitèktur kolonial wujud témbok-témbok kandel tur dhuwur lan arsitèktur Jawa kang wujud pandhapa. Arsitèktur Jawa katon saka payoné kang dawa utawa limasan. Fasad gedhong iki madhep lor lan ana èmpèr uga voorrit-é (yasan mawa payon kang gandheng yasan babon, minangka ruwang alihan antaraning pérangan jaba lan jero kang sinangga cagak wesi cacah papat). Gedhong iki kacathet ing BPCB Banten minangka cagar budaya Banten mawa nomer invèntaris 025.01.02.04.04 lan SK. Bupati Pandéglang 432/Kep.9-Huk/2018.