Damarwulan

Saka Wikipédia Jawa, bauwarna mardika basa Jawa
Loncat ke navigasi Loncat ke pencarian
Damarwulan, Wayang Klitik saka Jawa Wétan

Damarwulan ya iku salah sijiné tokoh legénda carita rakyat Jawa.[1] Kisah Damarwulan iki cukup populèr ing masarakat lan akèh vèrsi lakoné, sendratari lan uga carita tulis kang wis digawé.[1] Lumrahé, kisah-kisah iku manut saka Serat Damarwulan, kang dikira wiwit ditulis ing pungkasan panguasaan Majapahit.[1]

Ringkasan Carita[besut | besut sumber]

Dicaritakaké, jaman biyèn Damarwulan ngabdi dadi tukang ngarité Patih Loh Gender saka Majapait.[1] Amarga kapinterané, Damarwulan dadi abdi andalan Patih Loh Gender. Sak liyané iku, Anjasmara putri sang patih kesengsem lan seneng karo Damarwulan.[1] Banjur Damarwulan olèh tugas saka Raja Putri Majapait, ya iku Ratu Kencana Wungu, supaya nyamar kanggo ngalahaké Menak Jinggo panguasa Blambangan kang duwé niyat brontak karo praja Majapahit.[1] Damarwulan kang gantheng bisa narik kawigatèn selir-selir Menak Jinggo, ya iku Waeta lan Puyengan.[2] Amarga pambyantuné Waeta lan Puyengan, Damarwulan bisa nétuk gaman ampuhé Menak Jinggo ya iku Gada Wesi Kuning.[2] Menak Jinggo banjur bisa dikalahké lan Damarwulan dadi Pahlawan.[2] Seliré Menak Jinggo diboyong, lan banjur Damarwulan nglamar sang Raja Putri Majapahit.[2]

Nanging, ing kesenian wayang Banyuwangi lan Jangèr, carita Menak Jinggo béda karo carita ing serat Damarwulan.[2] Menak Jinggo iku bagus, disenengi wong wadon, wicaksana, lan seneng tulung-tinulung karo rakyaté.[2] Menak Jinggo ngraman amarga Kencana Wungu ora nepati janjiné ora gelem dipèk bojo Menak Jinggo sawisé Menak Jinggo ngalahaké Kebo Marcuet kang gawé gègèr ing Majapahit.[2] Sanajan Menak Jinggo bisa dikalahké Damarwulan, nanging Menak Jinggo dianggep kinurmatan.[2]

Cathetan suku[besut | besut sumber]

  1. a b c d e f Koesoemawardhani, Goesti Raden Adjeng Siti Noeroel Kamaril Ngasarati. Damar Woelan ngarit. Toneelstuk van de Langendrija-Klitik (lakon wayang klitik). Soerakarta, 1930.
  2. a b c d e f g h Tjakraningrat, Kangdjeng Pangéran Harja. Serat Damarwulan. Penerbit R. Soemodidjojo, Ngajogjakarta Hadiningrat, 1953.