Ampel

Bambusa vulgaris utawa Pring Ampel

Ampel utawa pring ampel iku tuwuhan kang ana ing Jawa. Pring ampel nduweni 3 varietas Bambusa vulgaris kang ana ing Jawa. Ingkang kapisan yaiku Bambusa vulgaris, kang duweni ciri warna ijo mengkilap lan asring kasebut Pring Ampel. Nomer loro yaiku Bambusa vulgaris varietas striata kang duweni warna kuning, utawa kuning ana garis ijo kang lumrah diarani Pring Kuning utawa Pring Gadhing. Varietas kang nomer telu yaiku Bambusa vulgaris varietas wamin, kang duweni ciri ros kang cendhek lan rada lemu kang asring diarani pring wamin, biasane didadekake tuwuhan kanggo hiasan ing pekarangan.

Dasanama

Pring ampel duweni sebutan kang beda-beda. Ing Sundha diarani awi haur geulis utawa awi haur koneng. Ing Pulo Bali diarani tiying ampel, tiying hampyal, tiying puling. Nanging ing Inggris dhewe pring ampel diarani common bamboo utawa clumping bamboo. Akeh sumber kang nyebutake yen pring ampel iku duweni persebaran kang luas, utamane ing wilayah Tropis Asia, Afrika, Amerika lan dumugi Ostrali.

Kagunan

Pring ampel duweni kauletan kang kurang apik, amarga kalah karo kumbang thether lan kumbang penggerek. Jalaran kuwi pring ampel jarang digunakake kanggo bahan bangunan lan prabot. Watange saka pring ampel uga kurang lurus kaya pring jinis liyane (pring petung utawa pring apus) ananging rebunge saka pring ampel duweni rasa kang eca. Bubur saka pring ampel apik didadekake kertas.

Ing masarakat desa, pring ampel asring ditandhur lan dijarke tuwuh ing pinggiran kali amarga bisa ngurangi risiko longsor (erosi) tebing. Dadi salah sawijining mupangat saka pring ampel kanggo wong Jawa yaiku bisa njaga lingkungan kususe ing kali lan tebing.