Æthelflæd

Æthelflæd sing dilukis ing sawijiné manuskrip Abingdon Abbey (sakiwa-tengené taun 1200)

Æthelflæd utawa Aethelflaed (lair sakiwa-tengené 870 – tilar donya 12 Juni 918) iku panguwasa Mercia ing Inggris Tengah saka taun 911 nganti ing pungkasan uripé. Panjenengané iku putri tuwa dhéwé sang Alfred Agung, raja Krajan Wessex, sawijiné krajan Anglo-Sakson, lan garwané Ealhswith.

Æthelflæd lair sakiwa-tengené taun 870, nalika Inggris lagi gencar-gencaré diserang wong Viking. Ing taun 878, sabagéan gedhé Inggris dikuwasani wong Viking Dhènèmarken. Anglia Wétan lan Northumbria wus kasor lan Mercia dipara antara wong Inggris lan wong Viking. Nanging ing taun iku Alfred menang lan jaya ing Paprangan Edington. Ora suwé manèh paruh kulon Mercia dikuwasani Æthelred, Pangérané wong Mercia, sing padha nampa kajumenengané Alfred.