Ula anang

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Ular Anang
Klasifikasi èlmiah
krajan: Animalia
filum: Chordata
kelas: Reptilia
ordo: Squamata
Suborder: Serpentes
kulawarga: Elapidae
Genus: Ophiophagus
Species: O. hannah
Jeneng binomial
Ophiophagus hannah
Cantor, 1836
Wilayah sebaran (warna merah)

Ula anang utawa lanang (Ophiophagus hannah) yaiku ula kang nduwèni upas lan ula paling dawa kang ana ing dunya, kanti dawa awaké nganti sekitar 5,7 m.[1] [2] Ananging dawa kéwan diwasa ing umumé amung sekitar 3 – 4,5 m waé.[3] Ula iki diwedèni dening wong amerga upasé kang bisa matèni lan sipat-sipaté kang terkenal agresif.

Ula anang uga dikenal kanti pira-pira jeneng lokal kayata oray totog (Sd.), ula tedung abu, tedung selor (Kal.) lan liya-lyané. Sajroné basa Inggris disebut king cobra (raja kobra) utawa hamadryad.

Pengenalan[sunting | sunting sumber]

Ula kang awaké dawa lan ramping. Salah sijiné laporan saka Singapura nyathet salah sijiné ula anang dawané nganti 4,8 m nduwèni bobot awak nganti 12 kg.[4] Ula lanang cenderung luwih dawa lan gedhé yèn dibandingaké karo kang wédok.

Susunan perisai (sisik-sisik gedhe) ing ndas ula anang

Coklat kekuningan, coklat zaitun, nganti keabu-abuan ing bagéyan nduwur (dorsal) awak, kanti bagéyan ndas kang cenderung wérnané luwih terang. Sisik-sisik pojoké peteng utawa keirengan, kétok jelas ing bagéyan ndas. Sisik-sisik ngisor awak (ventral) wernané rodok klawu utawa rodok coklat, kajaba dada lan gulu wernané kuning cerah utawa krèm kanti pola belang ireng ora teratur, kang kétok jelas yèn ula iki ngangkat lan ngambakaké guluné. Ula kang isih cilik wernané luwih peteng utawa rodok, kanti bintik-bintik putih utawa kuning kang bentuk belang (garis) melintang, belang iki isih kétok samar-samar ing sebagiyan individu diwasa. Anak ula iki ndasé ireng kanti papat garis putih melintang ing nduwuré.[3][5]


Jenis kang serupa[sunting | sunting sumber]

Ula-sapi (Zaocys carinatus) nduwè bentuk awak lan werna kang mèh padha ula anang. Ing lapangan, kaloro ula iki biasané gampang kliru anggoné nyebut, kajaba ula anang ngedegaké guluné.

Penyebaran, habitat lan kebiasaan[sunting | sunting sumber]

Ula anang nyebar mulai saka India ing wilayah sisih kulon, Bhutan, Bangladesh, Burma, Kamboja, Cina kidul, Laos, Thailand, Vietnam, Semenanjung Malaya, Kepuloan Andaman, Indonesia lan Filipina. Ing Indonesia ula iki ditemokaké ing Sumatra, Kepuloan Mentawai, Kepuloan Riau, Bangka, Borneo, Jawa, Bali, lan Sulawesi.[6]

Ula anang isa ditemokaké mulai saka cepaking panté nganti kaduwuran sekurang-kurangé 1.800 m dpl. Ula iki manggoni ing werna-werna habitat, mulai saka alas dataran endèk, rawa, wilayah semak belukar, alas pegunungan, lahan pertanian, ladang tua, perkebunan, persawahan, lan lingkungan pemukiman. Ula kang lincah lan gesit kang biasané umpetan ing ngisor semak kang padet, bolongan ing oyot-oyot utawa wit-witan, ing ngisor tumpukan watu, utawa ing bongkahan karang.[2]

Upas ula anang[sunting | sunting sumber]

Upas ula anang kang utama kasusun saka protein lan polipeptida, kang dikasélaké saka kelenjar idu kang wis berubah fungsi, kang manggon ana ing sakmburiné mata. Nalika nyokot mangsané, upas iki nyalur léwat siung kang dawané sekitar 8–10 mm kang nancep ing daging mangsané. Senajan racun iki dianggep ora sekuat upas pira-pira ula kang liyané, ula anang isa ngetokaké jumlah upas kang luwih gedhé ketimbang ula-ula liyané.[7] Percobaan ing laboratorium nuduhaké yèn sak cokotan ula iki isa ngetokaké upas kang cukup kanggo matèni 10 wong.[8] Untungé akèh-akèhé wong kecokot ula iki namung nglebokaké upas sajroné jumlah kang ora fatal.[9][10]

Upas ula iki sipaté neurotoksin, yaiku nyerang sistem saraf korbané, sarta kanti cepet ngakibataké rasa rasa lara kang banget, pandangan kang blawur, vertigo, lan lumpuhan otot. Saterusé, korban bakal mengalami kegagalan sistem kardiovaskular, lan bisa ngakibataké mati amerga gagalé sisitem pernapasan.[7] Wondéné upas wis mlebu kanti jumlah kang cukup, kematian amung isa dicegah kanti penanganan sarta mènèhi antivenin (antiupas) kang trep lan cepet.[11]

Mangsa[sunting | sunting sumber]

Kayadéné jenengé (Ophiophagus artiné tukang mangan ula), mangsa utamané yaiku jenis-jenis ula kang ukurané rélatif gedhé, kayata Ula sanca kembang (Python) utawa ula jali (Ptyas).[2] Uga mangsa ula-ula kang nduwèni upas liyané lan kadal ukuran gedhé kayata mencawak. Ula anang kang dikurung gelem uga mangan daging utawa tikus mati kang diwènèhaké ing kandang ula utawa digosokaké marang awaké ula supaya mambu kayata ula.[8] Sakwisé ngelek mangsané kang gedhé, ula anang isa urip nganti pirang-pirang wulan suwiné tanpa mangan manèh. Iki diakibataké laju metabolismené kang suwi (lambat).[1]

Ula anang mburu mangsané kanti ngandalaké pandelengané lan ambu mangsané. Kayadéné ula-ula ing umumé, ula anang ngamburi hawa kanti nggunakaké ilaté kang ngepang, kang nangkep partikel-partikel ambu ing udara lan nggawa maring resèptor khusus ing telaké. Resèptor kang sènsitif tumprapé ambu iki disebut organ Jacobson.[1] Yèn mambu ambuné mangsané, ula iki bakal ngobahaké ilaté uga nglebokaké lan ngetokaké kanggo ngira-ira arah lan panggonan mangsané iku. Mata kang tajem (ula anang isa ndeleng mangsané kanti jarak kira-kira 100 m), indera perasa getaran ing awaké kang ngrayap ing lemah, lan naluri sarta kecerdasané mbantu banget kango nemokaké mangsané.[12] Ula iki isa obah kanti cepet ing sak nduwuré lemah lan mènèk wit kanti cepet uga. Mangsané, yèn perlu, diuyak nganti ing nduwur wit.[11]

Ula anang mburu mangsa biasané ing wayah awan utawa wayah wengi, ananging langka kétok aktif ing wayah mbengi. Akèh-akèhé herpetologis nganggepé minangka kéwan diurnal.[1] Kayadéné ula kobra kang liyané, wondéné ngrasa kaancem lan kepojok ula anang bakal ngedegaké guluné sarta megaraké balung rusuké sahéngga kurang luwih sepertelu bagiyan rai awaké ngadeg lan nggèpèng kaya spatula.[8] Lan uga, posisi iki bakal ngetokaké werna kuning lan corèt ireng ing dadané, minangka peringatan kanggo musuhé.

Akèh-akèhé ula anang, kayadéné kéwan ing umumé, wedi tumprapé manungsa lan ngupadaya ngindari marang manungsa. Ula iki uga ora saknalika nyerang manungsa kang ditemoni, tanpa ana provokasi sedurungé. Kasunyatan yèn ula iki lumayan akèh isa ditemoni ing sekitar permukiman warga, sementara longko wong kang dicokot déning ula iki, kabèh nunjukaké yèn ula anang ora seagrèsif kaya kang disangka.[3][11][8] Senajan mengkono, mawas diri tetep diperlokaké nalika ngadepi ula iki. Ula anang dikenal minangka ula kang nduwèni upas medèni, kang cokotané isa matèni manugsa. Uga kaya ula-ula liané, temperamèn ula iki angèl ditebak. Pira-pira individu isa dadi luwih agrèsif ketimbang kang liyané.[3] Mengkono uga, ing wektu-wektu katentu kayata nalika njaga endog-endogé, ula iki isa berubah dadi luwih sènsitif lan agrsif.[8]

Perbiakan[sunting | sunting sumber]

Ula anang ngendog sekitar 20 nganti 50 iji, kang dipanggonaké ing salah sijiné susuh panetasan digawé saka tumpukan res-resan godong kang wis garing.[3][2][8] Susuh iki kabagi saka rong ruangan, ing ngendi ruangan kang ngisor digunakaké kanggo ndèlèhaké endog lan ruang kang nduwur dienggoni déning baboné kang njaga endog-endogé nganti netes.[3][11][8] Ing India, ula iki ngendog sekitar wulan April nganti Juli. Endog-endogé ukurané sekitar 59 x 34 mm. Endog-endog iki netes sakwisé 71–80 dina, lan anak-anak ula kang metu nduwèni dawa awak antarané 50 nganti 52 cm.[8]

Ula anang lan manungsa[sunting | sunting sumber]

Senajan ula anang nduwèni upas kang isa matèni lan lan diwedèni déning manungsa, dèwèké sakbeneré yaiku kéwan kang isinan lan sak isa-isané ngindar saka ketemu marang manungsa.[3][13]

Ing wilayah sakbarané, isih ana pira-pira jenis ula kang nduwèni upas liané kang cokotané luwih fatal lan luwih akéh nyilakani korbané, ing antarané yaiku ula séndok (Naja kaouthia), bandotan puspa (Vipera russelli), lan ula welang (Bungarus fasciatus).[14]

Ing Burma, ula anang kerep digunakaké sajroné pagelaran pawang ula wédok. Pawang ula iku biasané nduwèni tato kang digawé nggunakaké mangsi campur upas ula, kang diyakini bakal nglindungi awaké déwéné saka ula iku. Ing akhir pagelaran, kanti cepet banget si pawang bakal ngambung mbun-mbunané ula kasebut kang ngadegaké guluné lan tudungé.[13]

Saiki populasi ula anang akèhé wis nyusut jumlahé amerga habitaté wis keganggu kayata ilangé alas-alas kang biasané dipanggoni. Senajan ula iki déning IUCN durung dilebokaké sajroné kéwan kang kaancam kepunahané, CITES wis mandang perlu kanggo ngawasi perdagangané lan nglebokaké sajroné Apendiks II.[15]

Galeri[sunting | sunting sumber]

Cathetan Sikil[sunting | sunting sumber]

  1. ^ a b c d Mehrtens, John (1987). Living Snakes of the World. New York: Sterling. ISBN 0806964618.
  2. ^ a b c d David, P and G. Vogel. 1996. The Snakes of Sumatra. An annotated checklist and key with natural history. Edition Chimaira. Frankfurt. p.148-149. ISBN 3-930612-08-9
  3. ^ a b c d e f g Tweedie, M.W.F. 1983. The Snakes of Malaya. The Singapore National Printers. Singapore. p.38.
  4. ^ Burton, R.W. 1950. The record Hamadryad or King Cobra (Naja hannah Cantor) and length and weights of large specimens. J. Bombay Nat. Hist. Soc. 49:561-562.
  5. ^ Stuebing, R.B. & R.F. Inger. 1999. A Field Guide to The Snakes of Borneo. Natural History Publications (Borneo). Kota Kinabalu. p. 199-201. ISBN 983-812-031-6
  6. ^ Ophiophagus hannah pada The Reptile Database
  7. ^ a b Freiberg, Dr. Marcos; Walls (1984). The World of Venomous Animals. New Jersey: TFH. ISBN 0876665679.
  8. ^ a b c d e f g h Daniel, J.C. 1992. The Book of Indian Reptiles. Bombay Nat. Hist. Soc. and Oxford Univ. Press. Bombay. pp. 115-117. ISBN 0-19-562168-9
  9. ^ "Ophitoxaemia (venomous snake bite)". http://www.priory.com/med/ophitoxaemia.htm.(Kaunduh 16/11/12)
  10. ^ Sean Thomas. "Most Dangerous Snakes in the World". http://www.seanthomas.net/oldsite/danger.html.(Kaunduh 16/11/12)
  11. ^ a b c d Capula, Massimo; Behler (1989). Simon & Schuster's Guide to Reptiles and Amphibians of the World. New York: Simon & Schuster. ISBN 0671690981.
  12. ^ Taylor, David (1997), King Cobra, http://www.nationalgeographic.com/kingcobra/index-n.html(Kaunduh 16/11/12)
  13. ^ a b Coborn, John (October 1991). The Atlas of Snakes of the World. New Jersey: TFH Publications. pp. 30,452. ISBN 978-0866227490.
  14. ^ Miller, Harry (September 1970), "The Cobra, India’s ‘Good Snake", National Geographic 20
  15. ^ "CITES List of animal species used in traditional medicine". http://www.cites.org/eng/com/aC/17/E17i-05Rev.doc.(Kaunduh 16/11/12)
Sumber artikel punika saking kaca situs web: "http://jv.wikipedia.org/w/index.php?title=Ula_anang&oldid=851915"