Ssireum

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Ssireum
Hangeul 씨름
Hanja 種競
Alih Aksara sing disampurnakaké ssireum
McCune–Reischauer ssirŭm

Ssireum inggih menika jinising olahraga gulat tradisional saking negara Korea.

Sajarah[sunting | sunting sumber]

Ssireum menika olahraga paling tua ing Korea ingkang sampun dipunwahyakaken saking zaman prasejarah.[1] Ing jaman rumiyin, masarakat Korea njagi awakipun piyambak saking anceman mungsuh kanthi cara nyinau ngèlmu bela diri. Ssireum kawiwitan saking gerakan-gerakan mencengkeram mawi tangan lajeng sansaya dangu gerakan ingkang énggal dipundamel. Nalika zaman Tiga Kerajaan, ssireum dipunlampahi kanggé kompetisi lan tujuan militer. Lukisan ssireum kagambar wonten ing Situs Makam Goguryeo (37 SM-660 M) ingkang dipunparingi nama Gakjeochong (角抵塚). Bukti sinerat paling wiwitan menika nyebataken andharan babagan ssireum inggih menika teks Cina saking Kitab Hou Han ingkang nyerataken pagesangan masarakat Korea nalika jaman rumiyin. Olahraga ssireum lajeng nyebar kanthi rikat nalika masa Dinasti Joseon (1394-1910). Kala menika, kompetisi-kompetisi ssireum dipunwontenaken kanthi gumyak nalika dinten-dinten ageng lan festival-festival ageng ing mangsa panas lan mangsa gugur. Para jawara padatanipun pikantuk bebungah kados sapi utawi asiling tetanèn.

Etimologi[sunting | sunting sumber]

Adhedhasar cathetan lan teks sajarah, nalika jaman rumiyin ssireum dipunsebat kanthi kathah istilah kadosta gakjeo, gakhui, gakryeok, gakgi, chihui, sangbak lan jaenggyo ingkang ngandharaken manéka pangembangan teknik-teknik ssireum. Tembung "gak" (角) menika asalipun saking aksara Cina kanthu teges satunggaling gelut ingkang dipunlampahi déning kalih kéwan kados sapi kanggé nedahaken kuwating fisik. Tiyang Cina kuno ugi nyebat teknik gulat ala Korea kanthi istilah Goguryeo-gi (高句麗技). Istilah "ssireum" wiwit dipunginakaken saking taun 1920-an.

Kompetisi[sunting | sunting sumber]

Kompetisi ssireum dipuntandhingaken wonten ing bunderan kanthi diameter kirang langkung 7 meter ingkang dipunparingi watesan awujud gundhukan pasir. Ingkang kaping pisan kalih pegulat kasebut sami mencengkeram sabuk pinggang (satba) kagungan mungsuhipun kanthi posisi berlutut, posisi menika dipunparingi nama baro japki. Bibar wonten aba-aba, lajeng kalih pegulat kasebut wiwit jumeneng lan sami gelut supados damel mungsuhipun dhawah, Ingkang dados jawara menika ingkang saged damel dhawah mungsuh dhateng lemah menawi ingkang kenging menika bagéyan awak ingkang langkung inggil tinimbang dengkul. [2] Menangipun pegulat menika dipunbiji saking kaping 3 dhahwahipun mungsuh ingkang dipunwastani paling sae. Samenika ugi wonten kompetisi ssireum kanggé tiyang èstri ingkang dipuntandhingaken kanthi paugeran ingkang sami kalihan tetandhingan ssireum jaler namung bédanipun menika busana ingkang dipunagem.

Wonten 4 kelas ingkang padatanipun dipuntandhingaken inggih menika antawisipun : kelas wulu (Taebaek), kelas ènthèng (Geumgang), kelas ènthèng utama (Halla) lan kelas abot (Baekdu). Nama kelas-kelas menika dipunpendhet saking nama 4 pucuk gunung ingkang wonten ing Korea. Nalika jaman rumiyin, para pegulat namung ngagem kathok dawa tradisional ingkang gadhah gulungan kandhel ingkang ginanipun kanggé cekelan nalika tandhing. Minangka gantosipun kathok tradisional menika satba, sabuk ingkang dipunginakaken wonten ing pinggang. Satba wiwit dipunagem saking taun 1950-an lan kathok tradisional boten dipunagem malih. Samenika olahraga ssireum dipunwastani kathah tiyang prospekipun boten saé kados taekwondo utawi hapkido ingkang sampun dipuntampi ing luar negeri. Liga profesional ssireum kirang dipunremeni lan kathah pegulat ingkang pindhah dhateng olahraga sanès. Samenika organisasi ingkang ngurus ssireum ing Korea inggih menika Korea Ssireum Organization.

Cathetan suku[sunting | sunting sumber]

  1. ^ (Koréa) General information about Ssireum at Yahoo Korea Encyclopedia
  2. ^ What is Ssireum? Korean Ssireum Research Institute.

Pranala njawi[sunting | sunting sumber]

Cithakan:Korea-stub

Sumber artikel punika saking kaca situs web: "http://jv.wikipedia.org/w/index.php?title=Ssireum&oldid=843347"