Serangan 11 September 2001

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Montase foto Serangan 11 September 2001

Serangan 11 September (ing basa Inggris uga diarani September 11, utawa 9/11 (diwaca nine one one, utawa nine eleven)), iku sawijining rangkaian saka patang seranganbunuh diri marang Amérika Sarékat ing New York City lan Washington, D.C. ing 11 September 2001. Ing dina iku, 19 téroris saka grup militan Al-Qaeda mbajak patang montor mabur panumpang. Montor mabur loro ditabrakaké World Trade Center ing New York City nganti loro-loroné ambruk. Banjur ana montor mabur siji sing ditabrakaké marang Pentagon. Pentagon rusak nanging ora nganti ambruk total. Banjur ana montor mabur siji (United Airlines Pamaburan 93) sing tiba ing ara-ara tegal ing Shanksville, Pennsylvania. Montor mabur iki sajatiné arep ditabrakaké para téroris ing Washington D.C., nanging para durjana iki gagal amerga dilawan para panumpang. Mèh 3.000 jiwa wong tiwas ing patang serangan iki.

Pamaréntah Amérika Sarékat banjur agé nudhuh al-Qaéda minangka dhalangé, lan ing taun 2004, Osama bin Laden minangka pamimpiné, pancèn ngaku menawa al-Qaéda sing tanggungjawab. Wiwitané dhèwèké sélak. Osama minangka alesané nyatakaké menawa panyengkuyung A.S. marang Israèl, anané militèr A.S. ing Arab Saudi lan sanksi ékonomi marang Irak sing dadi dhasaré serangan iki.

A.S. nanggepi serangan iki mawa operasi "Perang Marang Térorisme" (War on Terror) lan agé nyerang Afghanistan amerga pamaréntahan Taliban ing negara iki sing ngreksa lan mènèhi pondhokan kanggo al-Qaéda. Akèh negara banjur nggawé undhang-undhang anti-térorisme dadi sangsaya raket. Osama bin Laden dhéwé pungkasané dipatèni militèr A.S. ing Mei 2011 ing Pakistan.


Pranala njaba[sunting | sunting sumber]