Sentō

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Sentō ing Kyoto

Sentō (銭湯?) inggih menika satunggaling papan ingkang awujud padusan toya panas kanggé tiyang umum ingkang mapan wonten ing Jepang [1] [2]. Tiyang ingkang gadhah kekajengan siram kedah mbayar kanggé béaya mlebet papan menika. Antawisipun padusan kakung lan putri menika wonten ing papan ingkang kapisah. Setunggal bak siram dipunginakaken kanggé kungkum sesarengan pinten-pinten tiyang. Miturut Undang-Undang Pemandian Umum (Kōshū Yokujō-hō) Pasal 1, fasilitas padusan umum menika pikantuk ngginakaken toya panas ingkang dipunumubaken piyambak, toya mawi mineral saking tuk (mata air) panas, toya saking onsen, lan sanèsipun. Miturut undang-undang sanèsipun[3], ingkang ngelola padusan menika saged narik béaya siram kanggé pangguna jasa padusan umum.

Tatanan papan[sunting | sunting sumber]

Tatanan papan sentō: A. lawang mlebet lan ruang kangge gantos, B. kamar mandi, C. ruang boiler.

Sapérangan ageng sentō kagungan tatanan papan ingkang sami kalihan diagram wonten ing sisih tengen. Wonten ing sanginggilipun lawang mlebet menika dipunpasang noren ingkang sinerat mawi aksara hiragana u tawi kanji ingkang dipunwaos minangka yu (toya panas).

Bandai (papan kanggé lenggah ingkang njagi)

Papan siram tiyang kakung lan papan siram tiyang èstri menika dipunandharaken kanthi cetha wonten ing papan pitedahan. Wonten ing diagram, papan kanggé siram tiyang kakung menika mapan wonten ing sisih kiwa déné papan siram kangge tiyang èstri menika mapan wonten ing sisih tengen.

  • (1) Wonten ing bagéyan ngajeng, ing sisih tengen lan kiwa lawang sentō mlebet asring wonten taman kanthi ukuran ingkang alit.
  • (2) Ing sisih kiwa lan tengen lawang mlebet menika wonten rak sepatu lan papan wadah kanggé payung kagem para rawuh.
  • (4) Tiyang ingkang gadhah kekajengan siram dipuntampi déning penjaga ingkang lenggah wonten ing panggung inggil ingkang dipunwastani bandai (papan kanggé lenggah penjaga). Papanipun bandai menika wonten ing tengahing lawang mlebet ruang gantos kakung lan lawang mlebet ruang gantos èstri. Bibar mbayar beaya mlebet, tiyang ingkang badhé siram mapanaken busana lan rasukanipun wonten ing ruang gantos (datsuiba).
  • (3) Rak busana kanggé nyimpen busananipun para rawuh.
  • (5) Papan kanggé tilem bayi (dipunsiapaken ing ruang gantos èstri)
  • (6) Kran toya panas lan toya ingkang adhem utawi pancuran. Saderengipun mlebet ing bak siram, tiyang kedah siram lan ngresiki awak rumiyin ngginakaken toya saking kran.
Gambar:Sento.EdoTokyoOutdoorMuseum.jpg
Bak siram lan lukisan Gunung Fuji ing tembok.
  • (7) Bak kanggé kungkum ing toya panas. Ing tembok menika kadang kala dipunpasang papan pitedahan ingkang ngajaraken kados pundi siram kanthi cara Jepang lan pepeling ngresiki awak ing bak siram.
  • (8) Bahan bakar.
  • (9) Boiler.

Wonten ing ruang gantos padatanipun sampun cumawis otomat pengecer utawi lemari ès ingkang nyade unjukan adhem lan kadang kala wonten ès krim ugi.

Cathetan suku[sunting | sunting sumber]

  1. ^ (id) Mandi di Pemandian Umum Jepang, (dipunakses tanggal 3 Maret 2013)
  2. ^ (id) Pemandian umum, (dipunakses tanggal 3 Maret 2013)
  3. ^ Undang-Undang sehubungan Usaha-Usaha Khusus untuk Menjamin Kelangsungan Pemandian Umum (Kōshū Yokujo no Kakuho no tame no Tokubetsu Sochi ni kansuru Hōritsu)

Pirsani ugi[sunting | sunting sumber]

Pranala njawi[sunting | sunting sumber]

Logo Wikimedia Commons
Pirsani galeri bab Sentō ing Wikimedia Commons.
Sumber artikel punika saking kaca situs web: "http://jv.wikipedia.org/w/index.php?title=Sentō&oldid=836907"