Musiyum Affandi

Saka Wikipédia Jawa, bauwarna mardika basa Jawa
(Kaelih saka Muséum Affandi)

Koordhinat: 7°46′58″S 110°23′47″E / 7.782713°S 110.396397°E / -7.782713; 110.396397

Musiyum Affandi

Musiyum Affandi punika satunggalipun musiyum ingkang nyimpen kasiling karya pelukis legendaris Affandi. langkung saking 300 lukisan ingkang dipunsimpen wonten ing musiyum punika. Ing papan punika wonten 3 galéri lan satunggal griya ingkang kala rumiyin kanggé dalemipun pelukis Affandi punika. Griya punika unik, amargi atapipun awujud godhong gedhang saha wonten 2 lantai, mliginipun ingkang lantai nginggil kanggé kamaripun Affandi ingkang artistik. Musiyum punika mapan wonten ing Jl. Laksda Adisucipto, No. 167, Yogyakarta, 55281, Indonesia [1][2].

Musiyum punika ngélingaken kados pundi gigihing maestro lukis Indonesia kanthi nama Affandi anggènipun ngembangaken lan ngangkat drajat seni lukis ing Indonesia. Pelukis remenanipun Présidhèn RI kapisan, Ir. Soekarno punika asring damel paméran lukisan dhateng pundi-pundi. Sesarengan kaliyan punika, liwat karya-karyanipun Affandi pikantuk manéka penghargaan ing Asia lan Éropah. Ing antawisipun Bebungah Bedhamèn The Dag Hammarskjoed Prize saking Italia nalika taun 1977, Bintang Maha Jasa Utama saking Pamarentah RI nalika taun 1978, lan gelar Doctor Honoris Causa saking national University of Singapura ing taun 1977 [3].

Kabangun kanthi èstètis minangka étalase kanggé lukisan-lukisan Affandi, musiyum punika mapan wonen ing sakiwa tengenipun wit kamboja. Musiyum punika gadhah payon kanthu wujud kados godhong gedhang, membujur wonten ing sisih kulon Kali gajah Wong, lan madep langsung kaliyan Universitas Islam Negeri (UIN) Sunan Kalijaga. Sekawan galèri wonten ing musiyum punika unik sanget, atapipun lengkung kados godhong gedhang kanthi warni ingkang kathah piyambak warni ijo lan kuning damel kuwating artistik yasan musiyum [3].

Awit saking musiyum pribadi, nanging wonten ing pangembanganipun déning Yayasan Affandi minangka pangelola, musiyum ingkang nalika taun 1988 naté kerawuhan mantan Mahamantri Malaysia Dr. Mahathir Mohammad punika kabikak kanggé umum minangka warisan budaya. Kajawi punika, minangka wujud nggatosaken pendidikan lan pariwisata, awit taun 1985 musiyum punika mlebet dhateng Organisasi Barahmus (Badan Musyawarah Musiyum) Daerah Istimewa Yogyakarta lan nalika taun 1997 musiyum punika kadaftar dados anggota BMMI (Badan Musyawarah Musiyum Indonesia) [3].

Kaéndahan Musiyum Affandi[besut | besut sumber]

Sapunika Musiyum Affandi majang kirang langkung 1.000 karya lukis, 300 saking punika kalebet karyanipun Affandi piyambak. Musiyum punika kapérang dados 4 gladri, inggih punika Galéri I, Galéri II, Galéri III, lan Galéri IV. Saben galéri gadhah ciri kas lan karakteristik ingkang béda-béda.

Galéri I[besut | besut sumber]

Wonten ing papan punika wonten manéka warna lukisan Affandi wujud sketsa, lukisan cèt air, pastel lan cèt lenga ing nginggiling kanvas. Lukisan ingkang kapajang wonten ing Galéri I punika kalebet karya restrospektif ingkang ngandhut aji sajarah, saking wiwiting karir dumugi pungkasan. Kajawi punika para wisatawan saged ningali koleksi tuwa dhéwé ingkang kadamel ing taun 1936 lan koleksi unggulan kanthi irah-irahan Belajar Anatomi Duduk Telanjang (Potret Affandi) kadamel ing taun 1948 lan Potret Diri Menghisap Pipa kadamel ing taun 1977.

Galéri II[besut | besut sumber]

Sejatosipun papan punika kanggé lukisan karyanipun Kartika Affandi, nanging wonten ing kasunyatan papan punika kaginakaken kanggé ruwang pamèr kolèksi lukisan musiyum saking pelukis kondhang, kados ta Basuki Abdullah, Popo Iskandar, Hendra, Rusli, fajar Sidik, S. Sujoyono, Barli, Wahdi S., Bagong Kussudiarjo, Mochtar Apin, lsp. Gladri II punika kapérang dados 2 lantai, lantai kapisan isinipun lukisan ingkang asipat abstrak, déné ingkang lantai kalih kanggé lukisan kanthi corak realis.

Galéri III[besut | besut sumber]

Lantai kapisan saking galéri punika kaginakaken kanggé ruwang pamèr karya lukis kulawarganipun Affandi, kados lukisan paling énggal Kartika Affandi, putrinipun Affandi. Kajawi punika wonten ugi lukisan Rukmini Yusuf lan Juki Affandi, ugi wonten lukisan sulaman saking kain wol karya Maryati, garwanipun Affandi.

Galéri IV[besut | besut sumber]

Galéri IV punika kanggé ruwang pamer lukisan karyanipun Didit, putunipun Affandi.

Cathetan suku[besut | besut sumber]

  1. [1], (id) http://www.affandi.org/ Situs Resmi Musiyum Affandi (dipunakses tanggal 30 september 2012)
  2. [2], (id) http://www.yogyes.com Musiyum dan Monumen Affandi (dipunakses tanggal 17 Dhésèmber 2012)
  3. a b c [3][pranala mati permanèn], (id) http://www.jogjatrip.com Archived 2013-01-14 at the Wayback Machine. Musiyum Affandi (dipunakses tanggal 18 Dhésèmber 2012)