Mochi

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Mochi ès krim
Mochi sakura

Mochi (Jepang: 餅; Hanzi: (麻糬)) menika nama jinis kuwé ingkang kadamel saking beras ketan lajeng dipuntumbuk dumugi lembut lan lèngkèt ingkang dipunbentuk bunder-bunder. Panganan mochi piyambak asalipun saking Jepang, ananging kawéntar ugi ing Cina, Taiwan, Kamboja, Hawaii, Korea Selatan, lan Thailand sasampunipun wonten prosès kulturisasi, éwah-éwahan resep, lan sanèsipun saéngga ing negara kasebut kagungan mochi piyambak kanthi ciri khasipun piyambak [1].

Ing Jepang, mochi dados dedhaharan tradisonal ingkang padatanipun dipundhahar nalika warsa énggal, ugi kadang kala dipundhahar minangka camilan. Wonten ing Jepang gadhah perayaan khusus kanggé mochi ingkang dipunwastani mochitsuki [1]. Mochitsuki ugi dipunwastani cara tradisonal tiyang Jepang anggènipun damel mochi ngginakaken palu saking kayu kanggé numbuk beras mochi lajeng dipun-dang wonten ing wadhah watu utawi kayu ugi saged [2].

Sejarah[sunting | sunting sumber]

Kuwé ingkang dipundamel saking beras ketan ingkang dipuntumbuk menika kaginakaken kanggé perayaan warsa énggal déning para bangsawan Jepang ing periode Heian ( taun 794 - 1185 ). Wonten ing wiwitan abad kaping 10, manéka jinis mochi kaginakaken kanggé persembahan kekaisaran wonten ing upacara agami. Cathetan saking éra taun 1070 nyebataken bilih kuwé beras menika dados mochii. Nembé sekitar abad kaping 18 tiyang-tiyang wiwit nyebut kuwé menika mochi [2].

Kathah teori ingkang ngandharaken babagan asaling nama mochi kasebut. Salah satunggalipun bilih mochi menika asalipun saking tembung kriya motsu ingkang ateges kanggé nahan utawi gadhah nandhakaken bilih mochi menika panganan ingkang dipunparingaken déning para dewa. Wonten ugi tembung mochizuki ingkang ateges wulan purnama. Ugi wonten ingkang nyebut muchimi ingkang ateges lèngkèt utawi kraket. Para petani Jepang kala rumiyin dhahar mochi ing musim adhem kanggé nginggilaken stamina. Déné para samurai remen kaliyan mochi amargi gampil anggènipun nyiapaken lan dipunbeta dhateng pundi kemawon[2].

Mochi ing Indonesia[sunting | sunting sumber]

Samenika mochi ugi kawéntar ing Indonesia saéngga dados panganan khas saking dhaérah Semarang lan Sukabumi. Mlebetipun mochi dhateng Indonesia menika kinten-kinten sesarengan kaliyan mlebetipun bangsa Cina lan Jepang ing Indonesia ingkang mbeta budaya kan kebiasaan kalebet panganan tradisional [1]. Ing pangembanganipun mochi lajeng dipunisi kaliyan bahan panganan ingkang legi kadosta kacang abang, kacang ijo, buah-buahan, dumugi es krim [3].

Cathetan suku[sunting | sunting sumber]

  1. ^ a b c [1], (id) Mochi (dipun-akses tanggal 09 Januari 2013).
  2. ^ a b c [2], (id) Tradisi orang Jepang memakan kue mochi (dipun-akses tanggal 09 Januari 2013).
  3. ^ [3], (id) Mochi dari Jepang ke Sukabumi (dipun-akses tanggal 09 Januari 2013).
Sumber artikel punika saking kaca situs web: "http://jv.wikipedia.org/w/index.php?title=Mochi&oldid=836214"