Miyeokguk
Miyeokguk utawa sup miyeok (미역국) yaiku sup kas Korea kang digawe saka miyeok (rumput laut coklat;Undaria pinnatifida).[1] Sup miyeok digawe saka godhokan kaldu balung sapi lan diwenehi kecap.[1] Miyeok Korea kang diasilake saka laut duweni kuwalitas apik lan biyaane dipangan nalika garing.[1] Tradisine wong Korea menehi sup rumput laut marang ibu kang lagi nglairake amarga dipercaya miyeok ngandhut bahan kang bisa nambah kandungan asi.[1] Saliyane kuwi tradisi mangan sup miyeok uga ditindakake nalika ulang tahun.[1][2] Biyen bapak mertua kang ngenteni putune lair bakal tuku miyeok kang paling apik ing pasar.[1] Bentuk miyeok kang dawa lan amba yaiku kang paling digoleki.[1] Sawise tuku dheweke bakal gawa bali miyeok mau kanthi dipikul ing geger nganggo tali dami supaya ora remuk.[1] Tali dami dipercaya bisa nangkal gangguan arwah jahat.[1] Saliyane kuwi, yen miyeok mau tugel calon ibu bakal kesusahan nglairake anake.[1]
