Margaret Mead

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Margaret Mead

Margaret Mead (16 Desember 190115 November 1978) inggih menika salah satunggaling antroplog budaya Amerika.[1] Mead miyos ing Philadelphia, Pennsylvania lajeng ageng ing kitha Doylestown, Pennsylvania ingkang boten tebih saking kitha miyosipun.[1] Ramanipun inggih menika satunggaling profesor ing salah satunggaling universitas, déné ibunipun satunggaling aktivis sosial.[1] Mead lulus saking Barnard College taun 1923 kaliyan pikantuk gelar Ph. D saking Universitas Columbia ing taun 1929.[1] Ing universitas menika Mead kepanggih kaliyan Ruth Benedict kaliyan Franz Boas ingkang dados prabawa intelektual kanggé Mead ing Columbia.[1] Margaret Mead kalebet antropolog ingkang paling misuwur ing donya.[2] Lumantar padamelanipun dados antropolog, kathah tiyang ingkang saged sinau babagan antropologi kaliyan visi holistik saking spèsiès manungsa.[2] Mead maringi kathah sumbangan kanggé ngrembakanipun dhisiplin èlmu, sarta sampun nepangaken wawasan dhumateng éwonan tiyang ing njawi akademi.[1] Mead sampun ngasilaken 44 buku kaliyan langkung saking 1000 artikel.[1]

Kulawarga[sunting | sunting sumber]

Margaret Mead miyos ing Philadelphia, Pennsylvania 16 Desember 1901 nanging ageng ing kitha Doylestown.[3] Mead menika putri pambarep saking sedherèkipun ingkang gunggungipun sekawan.[3] Ramanipun inggih menika satunggaling profesor ing bidhang dana (bidang keuangan), déné ibunipun ingkang asmanipun Emily Fogg Mead inggih menika satunggaling sosiolog.[3] Mead kagungan rayi wadon ingkang asmanipun Katherine nanging séda nalika yuswanipun taksih 9 wulan.[3] Kulawarganipun gesang kanthi cara nomaden, saéngga panjenenganipun kapeksa ndhèrèk home-schooling.[3] Miyos ing satengahing kulawarga ingkang gadhah manéka jinis bobot, bibit, kaliyan bèbètipun, ndadosaken Mead anggadhahi tekad ageng supados ngupadi jati dhirinipun.[3]

Karier[sunting | sunting sumber]

Sadangunipun Perang Donya II, Margaret Mead ngabdi dados sekretaris eksekutif saking National Research Council's Committee on Food Habits.[3] Ing taun 1948, Mead kapilih dados anggota ing American Academy of Arts and Science. Sasampunipun menika, Mead dados profesor antropologi ing Fordham University's Lincoln Center Campus saking taun 1968 ngantos taun 1970.[3] Margaret Mead naté mengku kathah jabatan ing American Association for the Advancement of Science kaliyan dados presidhèn organisasi ing taun 1975.[3] Margaret nindakaken panalitèn babagan saklompok tiyang ing Samoa.[3] Ing panalitèn menika, Margaret Mead mapan, guyub, nindakaken kagiyatan, lan ngawontenaken wawancara dhateng 68 tiyang wadon saking yuswa 9 taun ngantos yuswa 20 taun.[3] Kasil saking panalitènipun inggih menika saged ngandharaken bilih kadéwasan tiyang Samoa dipuntandhani kathi éwahipun ingkang temata, sanès minggah mudhunipun emosi utawi psikologis kémawon kados kasus ingkang ditemokaken ing Amerika.[3] Kasil panalitèn menika nuwuhaken kathah kecaman saking sawatara pihak. Nanging, tanggal 19 Januari 1979 inggih menika setunggal taun sasampunipen Mead seda, Presidhèn Jimmy Carter nganugrahi Margaret Presidential Medal of Freedom kanggé Margaret Mead.[3] Duta ageng Amerika, Andrew Young ingkang dados sesulih saking Presidhèn Amerika masrahaken anugrah menika dhumateng putranipun Margaret Mead.[3]

Bibliografi[sunting | sunting sumber]

  • Coming of Age in Samoa (1928) ISBN 0-688-05033-6
  • Growing Up in New Guinea (1930) ISBN 0-688-17811-1
  • The Changing Culture of an Indian Tribe (1932)
  • Sex and Temperament in Three Primitive Societies (1935)
  • Male and Female (1949) ISBN 0-688-14676-7
  • New Lives for Old: Cultural Transformation in Manus, 1928-1953 (1956)
  • People and Places (1959; buku kanggé pamaos enèm)
  • Continuities in Cultural Evolution (1964)
  • Culture and Commitment (1970)
  • Blackberry Winter (1972; biografi babagan Mead nalika taksih enèm) ISBN 0-317-60065-6

Buku-buku suntingan[sunting | sunting sumber]

  • Cultural Patterns and Technical Change, penyunting (1953)
  • Primitive Heritage: An Anthropological Anthology, penyunting kaliyan Nicholas Calas (1953)
  • An Anthropologist at Work, penyunting (1959, dipunambali cetak taun 1966; buku ingkang ngemot seratan-seratanipun Ruth Benedict)
  • The Study of Culture At A Distance, penyunting kaliyan Rhoda Metraux, 1953
  • Themes in French Culture, dipunserat kaliyan Rhoda Metraux, 1954
  • A Way of Seeing, dipunserat kaliyan Rhoda Metraux, 1975


Cathetan Suku[sunting | sunting sumber]

  1. ^ a b c d e f g (en)Margaret Mead(dipunundhuh 17 November 2012)
  2. ^ a b (en)Biografi Margaret Mead(dipunundhuh 17 November 2012)
  3. ^ a b c d e f g h i j k l m n (id)Profil Margaret Mead(dupunundhuh 17 November 2012)


Pranala Njawi[sunting | sunting sumber]

Sumber artikel punika saking kaca situs web: "http://jv.wikipedia.org/w/index.php?title=Margaret_Mead&oldid=835447"