Manzai

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados

Manzai (漫才?) yaiku seni nglawak kang asalé saka dhaerah Kansai, Jepang. Pagelaran Manzai biyasané ditindakaké déning wong loro kang lagi celathu sangareping panonton nyritakaké carita kang lucu lan ora mlebu akal kanthi irama celathuné kaya saut-sautan. Wong siji nduwéni peran minangka si pinter (tsukkomi) kang fungsiné minangka pangumpan, lan wong sijiné manèh nduwéni peran minangka si goblog (boke) kang ngomong terus supaya penontoné guyu. Manzai diarani mèmper stand-up comedy kang dikenal ing Amérika Sarékat.

Istilah manzai diciptakaké taun 1933 déning bagéyan iklan promotor seni hiburan Yoshimoto Kogyo ing Osaka kanggo mbédakaké kesenian kang dipentasaké karo seni mawa carita Mandan. Nalika kuwi, seniman Mandan kerep nyambu gawé ing gedhung biyoskup kanggo njelasaké isi carita film bisu kang lagi diputer.

Pelaku Manzai sinebut Manzai-shi. Pasangan Manzai sinebut Kombi. Pasangan lanang-wadon kang wis kawin kang nindakaké Manzai sinebut Meoto manzai. Manzai kang asalé saka dhaerah Kansai uga kerep diarani minangka Kamigata manzai.

Sajarah[sunting | sunting sumber]

Ing jaman Heian ana seni pagelaran kang ditindakaké kanthi muter-muter kanggo ngayakaké taun anyar. Seni mau uga sinebut manzai (万歳?), nanging katulis kanthi aksara kanji kang beda. Seni "Manzai" ing jaman Heian ditindakaké déning wong loro, wong kang sepisan nabuh gendhang lan sijiné manèh nari-nari kanggo ngucapaké sugeng warsa enggal sinambi dolani omahé para pendhudhuk. Ing jaman Edo ing sakubenging pelosok Jepang ana manéka jinis manzai kang dijenengi manut jeneng asliné kayata Mikawa manzai asalé saka Provinsi Mikawa lan Yamato manzai asalé saka Provinsi Yamato. Nalika kuwi, artis Manzai ora mung mainaké musik lan nari, nanging celathuné uga nyritakaké carita lucu kang dimaksudaké kanggo mancing guyuné penonton.

Ing jaman Meiji, seni manzai (万才?) kang digelar ing gedhung ing Osaka isih adhedhasar "manzai" (万歳?) jaman Heian kang nggunakaké musik pangiring. Pasangan Tamagoya Entatsu, Sunagawa Sutemaru, lan Nakamura Haruyo kerep sinebut minangka pelopor Manzai. Émané nalika kuwi, Manzai mung dianggep minangka pagelaran palengkap amarga ing gedhung pagelaran luwih kerep ana pagelaran rakugo kang lagi misuwur.

Ing pungkasan jaman Taisho, Yokoyama Entatsu (1896-1971) lan Hanabishi Achako (pasangan pelawak Yoshimoto Kogyo) miwiti gaya manzai tanpa musik, lan mung pacetahon. Manzai gaya anyar iki sinebut syabekuri manzai kang jebulé misuwir lan bisa ditampa masarakat. Udakara taun 1931, promotor hiburan Yoshimoto Kogyo mulai ngringkes sebutan syabekuri manzai dadi Manzai (漫才?) kaya kang dikenal saiki. Banjur Yoshimoto Kogyo nindakakè ekspansi bisnis ing Tokyo. Manzai kang dipelopori pasangan Entatsu-Achako dadi misuwur, lan uga ana bintang-bintang manzai kang anyar. Ing jaman modern, manzai ngrembaka dadi seni kang ora mung dipentasaké ing gedhung pagelaran, ananging uga ing télévisi lan radio.

Ciri khas[sunting | sunting sumber]

Beda karo seni rakugo kang kaiket déning aturan, pelawak manzai nduwéni pirang-pirang kabebasan. Pelawak entuk ngomong sinambi posé utawa gerakan anèh, joget-joget, nganti ngepruki si goblog. Manzai biyasané ditindakaké tanpa musik, sebajan uga ana pelawak manzai kang nalika pentas sinambi main piranti musik utawa nggunakaké musik latar. Saliyané kuwi, klompok kang kasusun saka 3 wong (utawa luwih) uga mainaké manzai gaya anyar kanthi bentuk lakon komèdi.

Ing panggung, pelawak manzai kudu nggunakaké sandangan paling apik kang diduwéni. Dhasaré, sandangan pelawak manzai yaiku busana pesta. Pelawak manzai lanang nggunakaké kimono utawa setélan jas lan dasi, déné pelawak manzai wadon nggunakaké kimono utawa klambi blanjuran kang wernané nyolok, lengkap karo sepatu kang nduwéni hak dhuwur.

Manut sumrambahé jaman, sapérangan pelawak manzai nduwéni peran minangka pelawak ing télévisi (Owarai Talento utawa Owarai Geinin). sandangan kang digunakaké nalika tampil ing panggung yaiku sandangan santai kang digunakaé saben dinané. Pelawak manzai gaya anyar kerep nggunakaké properti panggung, kayata kursi, meja, lemari, lan layar proyeksi.

Si pinter lan si goblog[sunting | sunting sumber]

Pasangan pelawak manzai sinebut kombi. Sawijining pelawak nduwéni peran minangka si pinter (tsukkomi) lan sijiné manèh nduwéni peran minangka si goblog (boke). Peran si goblog yaiku crita kanthi isi kang nduwéni kajanggalan, saéngga anèh utawa lucu, kanthi ancas mancing guyu. Pelawak kang nduwéni peran si pinter tugasé yaiku ngliruhi carita si goblog, lan mbeneraké bagéyan-bagéyan kang kaanggep janggal, saéngga penonton ngerti nalika kudu guyu.

Pelawak kang dadi si pinter kadang-kadang nggunakaké tembung-tembung kang ngenyèk kanggo ménéhi ngerti si goblog yèn critané anèh utawa janggal. Ora mung kuwi, pelawak nduwéni peran minangka si goblog ora jarang nampa tamparan tangan ing sirah utawa bagéyan dada. Kadang-kadang pemeran si goblog uga kudu nampa kepruk ing bagéyan sirah kanthi nggunakaé kertas karton kang dilempit kaya kipas, utawa dolanan kang bisa nywara kaya swara kepruk banter.

Beda karo si goblog kang terus-terusan kudu crita, si pinter mung kadang-kadang nginterupsi carita si goblog. Maksudé minangka umpan supaya si goblog dadi luwih lucu. Kalodhangan iki uga dimanfaataké si goblog kanggo ngunjal napas, saéngga témpo carita kang cepét bisa dipertahanaké.

Pranala jaba =[sunting | sunting sumber]

Sumber artikel punika saking kaca situs web: "http://jv.wikipedia.org/w/index.php?title=Manzai&oldid=834101"