Lobak

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Lobak
Klasifikasi èlmiah
krajan: Plantae
ordo: Brassicales
kulawarga: Brassicaceae
Genus: Raphanus
Species: R. sativus
Jeneng binomial
Raphanus sativus
L.

Lobak yaiku tanduran kang kalebu kulawarga: Cruciferae. Bentuk umbi lobak kaya wortel, ananging isi lan kulite wernane putih.

Tanduran lobak asale saka negera Cina, ananging wis akeh diusahakake ing Indonesia. Tanduran iki gampang ditandur ing dataran rendah utawa dhuwur (pegunungan).

Nganti seprene dhaerah kang akeh ditanduri lobak yaiku dhataran dhuwur Pangalengan, Pacet, Cipanas, lan Bedugul. Ambane areal tanduran lobak ing Indonesia saiki udakara 15.700 ha.

Lemah kang apik kanggo tanduran lobak yaiku lemah gembur, ngandhut humus (subur) lan lapisan dhuwure ora ngandhut krikil (watu-watu cilik).

Banjur derajat keasaman lemahe 5-6, dene wektu tandure yaiku mangsa rendheng utawa wiwitan mangsa ketiga. Ananging yen nandur ing mangsa ketiga, banyune tanduran kudu cukup.

Carane Nandur[sunting | sunting sumber]

Lobak ditandur saka wijine. Bibit lobak ora perlu saka luar negri (impor), cukup saka asil wiji kuwi dhewe amarga tanduran iki gampang ngembang lan uga gampang thukul wijine. Wiji-wiji mau bisa ditandur langsung ing kebun tanpa disemai disik. Yen nandure ambane 1 ha diperlokake wiji cacah 5 kg.

Miturut teori, kanggo lahan kang ambane 1 ha diperlokake 4 kg wiji janthi daya kecambah 75%. Sadurunge wiji ditandur, lahan kang arep ditanduri diolah disik kanthi dipaculi nganti jerone 30-40 cm, banjur diwenehi rabuk kandhang utawa kompos 10 ton/ha. Sawise lemah diratakake, digawe alur kanthi jarak antaralur 30 cm.

Prayogane alur mau digawe mujur saka sisih kulon tekan wetan supaya srengengene bisa mlebu ing tanduran saakeh-akehe. Candhake wiji-wiji mau disebarake tipis ananging rata sadawane alur, banjur ditutup lemah tipis-tipis. Wijine bakal thukul sawise 4 dina.

Sawise umur 2-3 minggu, tanduran mulai diwatuni sinambi digawe guludan. Guludan digawe kanthi cara lemah ing sadawaning barisan tandurn didhuwurake. Sinambi ndangir lemah, tandurane digawe arang-arang. Carane tanduran kang thukule endhek-endhek dijabuti lan kang subur ditinggalake.

Sawise digawe arang-arang, jarak tandurane dadi 10-20 cm. Padatan petani arang menehi rabuk pabrik. Ananging supaya entuk asil kang luwih akeh, tanduran lobak sejatine perlu diwenehi abuk pabrik.

Rabuk pabrik kang diperlokake yaiku urea, TSP kanthi perbandingan 1:2 cacah 6 g saben tanduran. Rabuk ing kiwa tengen watang tanduran kanthi jarak 5 cm. Mula, kanggo tanduran kang ambane 1 ha diperlokake 100 kg rabuk urea lan 200 kg TSP. Rabuk prayogane diwenehake nalika lemah didangir.

Pangopenan tanduran[sunting | sunting sumber]

Tanduran lobak kudu dijaga saka tuma-tuma godhong kang bisa nyerang. Ama iki bisa dibrantas kanthi nyemprotake insektisida, kayata Kelthin 0,2% utawa Decis 2,5 EC 0,2-0,3%.

Panenan[sunting | sunting sumber]

Asil tanduran bisa kajupuk sawise umbi-umbine cukup gedhe, kira-kira sawise tanduran umur 2 wulan. Yen kesuwen anggone methik asil, bakal nyebabake umbi dadi kayu lan rasane uga ora enak (kapus-kapus). Yen nganti kedadeyan kaya mangkono, umbi lobak ora payu menawa didol.

Tanduran kang kopèn bisa ngasilake umbi 15-20 ton/ha. Malah ana jinis lobak kang bisa ngasilake umbi kang bobote mancik 0,5-1 kg saben tanduran lan rasa umbine uga enak.

Manfaat lobak[sunting | sunting sumber]

Lobak bisa digunakake minangka obat gangguan ginjal lan lara panas. Saliyane kuwi, uga bisa ngasilake lender jroning krongkongan saengga apik kanggo obat watuk. Lobak, utamane umbine bisa dipangan mentah utawa digawe acar (asinan), ananging umume digawe minangka campuran soto.

Sumber artikel punika saking kaca situs web: "http://jv.wikipedia.org/w/index.php?title=Lobak&oldid=837537"