Bintang Jasa
Bintang Jasa inggih punika salah satunggaling wujud bintang penghargaan sipil ingkang dipunwedalaken lan dipunparingaken déning pamaréntah Republik Indonesia, ingkang drajatipun satunggal tingkat langkung andhap tinimbang Bintang Mahaputra. Bintang punika dipunwedalaken lan dipunparingaken dhateng sinten kémawon ingkang gadhah jasa sanget luar biyasa dhateng nusa lan bangsa wonten ing babagan utawi prastawa utawi prakawis tartamtu ing sak njawining babagan militèr. Bintang Jasa maujud saking sinar dawa ingkang pucukipun cacahipun wonten gangsal lan berkas sinar ingkang cekak kanthi pucukipun cacahipun gangsal ugi, kanthi wonten lambang Bhinnéka Tunggal Ika. Bintang Jasa kapérang dados tigang kelas, inggih punika:[1]
- Bintang Jasa Utama (Uttama: ingkang paling inggil, ingkang saé piyambak, ingkang paling hebat)
- Bintang Jasa Pratama (Prathama: ingkang sapisan)
- Bintang Jasa Nararya (Nara: tiyang, manungsa; aryya: kinurmatan)
Dhasaring Kukum[besut | besut sumber]
Dhasaring kukum wontenipun bintang jasa ing antawisipun inggih punika wonten:
- UU No. 5 Taun 1963 ngengingi Tandha Kaurmatan Bintang Jasa.[2]
- UU No 4 Taun 1972 ngengingi éwah-éwahan lan tambahan ketentuan sapérangan jinis tandha kaurmatan REpublik Indonésia ingkang awujud bintang lan ngengingi urut-urutan tingkat / drajat tandha kaurmatan bintang.
Sarat-saratipun[besut | besut sumber]
Ancasipun dipunparingaken bintang jasa punika inggih sajatosipun kanggé ngregani lan ngurmati warga nagara Indonésia (WNI) ingkang gadhah jasa ageng dhateng nagara lan bangsa wonten ing satunggaling babagan tartamtu utawi prastawa utawi sapérangan prakawis tartamtu. Déné tiyang-tiyang ingkang badhé pinaringan penghargaan punika inggih kedah njangkepi sapérangan sarat-sarat ingkang sampu dipuntemtokaken. Sarat Umumipun inggih punika:
- Warga Nagara Indonésia
- Gadhah tindak tanduk lan budi pakarti ingkang saé
- Boten naté dipunkukum wonten ing kunjara langkung saking satunggal taun amargi nindakaken satunggaling tumindak ala
Lan sarat-sarat ingkang khususipun inggih punika kedah gadhah jasa ageng dhateng nusa lan bangsa wonten ing satunggaling babagan tartamtu utawi prastawa lan prakawis tartamtu. Déné jasa-jasa ageng ingkang dipunparingaken inggih awujud jasa-jasa ingkang saged migunani kanggé selameting utawi sejahteraning utawi saged ngrembakakaken nagara lan bangsa, jasa-jasa ingkang dipunparingaken kanthi ikhlas lan pangurbanan ingkang ageng kados ta nindakaken tugas ingkang sampun liwat saking ingkang dados kuwajibanipun saha kanthi raos tanggel jawab ingkan ageng utawi jasa-jasa ingkang ngetingalaken wontenipun raos wantun lan tatag ingkang sanget luar biyasa wonten ing satunggaling prastawa utawi perkwis ingkang wigati kanggé kaslametan lan kasejahteranipun nagara.
Cathetan suku[besut | besut sumber]
- ↑ BINTANG JASA (dipunundhuh tanggal 8 Maret 2013)
- ↑ Undang-Undang Tanda Kehormatan Bintang Jasa (UU 5 thn 1963)(dipunundhuh tanggal 8 Maret 2013)