Lesung

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados

Lesung yaiku piranti tradisional kanggo ngolah pari utawa gabah supaya dadi beras. Mupangaté piranti iku kanggo misahaké kulit gabah (berambut) saka pari, yaiku carané kanthi ditutu utawa didheplok alon-alon. Gabah kang diolah dilebokaké ing bagéan sing bolong. Lesung biasané didèlèh ing pawon. Lesung iku sabeneré mung arupa wadhah kang cekung, biasané digawé saka kayu jati kang gedhé lan dibolongi bagéan tengah utawa dibuwang bagian tengahé (digrowongi) nganti jero. Pari utawa gabah di tutu (didheplok) nganggo alu, cagak utawa tongkat sing digawé saka kayu, bola-bali lan beras banjur bisa pisah saka sekam (berambut).

Wujud lesung rupa-rupa, saka lonjong, bunder, pesagi uga segi telu.

Lumpang[sunting | sunting sumber]

Gambar lumpang lan cowèk

Ana piranti sajinis lesung sing biasané wujudé cilik lan biasa kanggo ndheplok bahan-bahan sing luwih alus utawa kanggo ngalusaké obat-obatan diarani lumpang, déné sing biasa kanggo nguleg sambel diarani cowèk lan pasangané uleg-uleg.

Lesung bisa uga dianggo nutu (ndheplok) bumbu pawon kayata lombok, kacang, wiji kopi, gemblong, gendar, gethuk, lan uga barang-barang kang atos banjur dilembutaké sing cacahé akèh.

Lesung uga bisa dadi piranti kanggo ngetokaké suara kang pénak dirungu yaiku arupa kothèkan. Nalika nutu bebarengan, wong padésan nuthuk aluné nganggo irama lan senggakan kayadéné nabuh tetabuhan dadi banjur ngasilaké swara sing harmoni kanggo nambah semangat nyambutgawé.

Tumpukan lumpang kayu

Amarga perkembangan jaman, lesung ing jaman maju wis ora kanggo nutu pari manèh, ananging wis akèh owah-owahan kagunané. Ing jaman maju iki lesung kerep dimupangataké kanggo pajangan ana ing omah utawa diolah dadi bakalan kang luwih mupangati, kayata : digawé papan, kusèn, méja, lawang utawa wayang golèk.

Amarga kayu jati sing tuwa saiki wis arang ditemoni lan regané larang banget mula ing mata para kolèktor banjur dadi barang kang aji lan antik sing nduwèni seni.


Deleng uga[sunting | sunting sumber]

Pranala njaba[sunting | sunting sumber]

Sumber artikel punika saking kaca situs web: "http://jv.wikipedia.org/w/index.php?title=Lesung&oldid=829126"