Kue Kranjang

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Roti Kranjang

Kue Kranjang sing biasa disebut kue ranjang (uga biasa kasebat déning masyarakat Cina: Nian Gao (年糕), utawa ing dialek Hokkian Tii Kwee (甜棵)), yaiku sawijining panganan sing éntuk jeneng saka wadhah cithakané kang awujud kranjang.[1] Kue Kranjang iki digawé saka glepung ketan lan gula, sarta nduwèni tèkstur sing kiyal lan lèngkèt.[1] Kue Kranjang iki salah sawijining kue khas utawa wajib pas pahargyan taun anyar Imlèk.[1] Kue Kranjang iki wiwitané digawé lan digunakaké dadi sajèn nalika upacara sembahyang para leluhur, enem dina sadurungé taun anyar Imlèk (Jie Sie Siang Ang), lan puncaké pas malem sadurungé taun anyar Imlèk.[1] Yaiku dadi sajèn, kue iki biasané ora dipangan nganti Cap Go Meh (malem sing ka-15 sawisé Imlèk).[2]

Ing sekawit dipercaya manawa panggawéné Kue Kranjang iki dikarepaké dadi suguhan sing nyenengaké Dewa Tungku supaya bisa nggawa lapuran kang nyenengaké marang Raja Surga (玉皇大帝,Yu Huang Da Di).[2] Ora mung kuwi, bentukké sing bunder nduwèni teges supaya kulawarga sing mahargya Imlèk iku bisa nyawiji, guyup rukun, lan nduwèni tekad kuwat kanggo ngadhepi taun ngarep.[3]

Asal-usul jenengé[sunting | sunting sumber]

Kue Kranjang nduwèni jeneng asli Nien Kao utawa Ni-Kwee sing nduwèni teges kue taunan amarga namung digawé setaun sapisan pas ameh ngrayakke taun anyar Imlèk.[3] Ning Jawa Wetan kasebut Kue Kranjang amarga dicethak ning njero kranjang bolong cilik, nek ning Jawa Kulon diwenehi jeneng Kue Cina kanggo nunjukke asal kue yaiku Cina, neng pirang-pirang enek uwong ngrujuk saka gawenne, yaiku wong-wong Tionghoa.[3] Nek ning dialek Hokkian, Tii Kwee nduwèni teges kue legi, sing ora anggawe angel uwong-uwong nebak nek rasane legi.[4]

Teges ning sewalikke Kue Kranjang[sunting | sunting sumber]

Ning Cina eneng kebiasaan nek pas taun anyar Imlèk sadurungé mangan Kue Kranjang, sadurungé mangan sega amarga nduwèni pangarepan supaya kerep olèh barokah neng saben taun.[5]

Nien Kao utawa Nian Gao, tembung "Nian" nduwèni teges dhewe yaiku taun lan "Gao" nduwèni teges kue lan uga supaya krungu tembung dhuwur, amarga kuwi Kue Kranjang asring disusun dhuwur.[3] Saya dhuwur saya cilik kue sing ditumpuk mau, sing nduwèni teges supaya nambah rejekine utawa makmure.[3] Ning jaman dhisik akeh lan dhuwur Kue Kranjang kuwi nandakke makmure kaluwarga nduwèni omah.[3] Biasane Kue Kranjang ditumpuk mendhuwur nganggo kue mangkok sing nduwèni werna ning ndhuwure.[3] Iki yaiku dadi simbol panguripan apik sing saya mendhuwur lan mekar kaya kue mangkok.[3]

Cara ngladèkaké[sunting | sunting sumber]

Kue sing digawé saka beras ketan lan gula iki bisa disimpen suwé, malah bisa dipépé dadi atos kaya watu lan awèt.[3] Sadurungé dadi atos kue iki bisa diladèkaké langsung, malah sadurungé atos bisa diolah dhisik tuladhané digorèng nganggo glepung lan endhog pithik lan diladèkaké nalika isih anget.[3] Bisa uga diladèkaké dadi bubur carané dikukus (di-tjwee) sawisé ditambahaké bumbu-bumbu sing dipingini.[2]

Proses Nggawe Kue Kranjang[sunting | sunting sumber]

Proses Nggawe Kue Kranjang, yaiku:[3]

  1. Sepisanan tumbuk beras ketanne nganthi bisa diayakki
  2. Gula pasir digawé sirup dhisik
  3. Sawisé kuwi tepung lan sirup gula mau dicampur lan diudak lan diendepke 10 dina
  4. Nek prosese wis rampung, adonan mau ditambahi maneh nganggo sirup supaya bisa cuer
  5. Sawisé kuwi, prosese yaiku Kue Kranjang dicethak
  6. Sadurungé disiapke kranjang-kranjang bulet sing nduwèni garis tengah 8 - 10 cm lan dilemekki nganggo godhong pisang sing uwis digarang sadurungé
  7. Sawisé kuwi kranjang-kranjang diisi adonan mau
  8. Kranjang-kranjang mau diisi adonan lan ditata sarta diuapi 9 jam
  9. Sawisé kuwi yaiku dibunthel pas nduwure, bunthelane bisa saka godhong pisang utawa plastik
  10. Disimpen sing apik lan bungkusane ora olèh suwek, Kue Kranjang bisa kuat nganti 6 sasi nganti 1 taun, lan kualitase uga ora suda.

Kapustakan[sunting | sunting sumber]

  1. ^ a b c d [1] (diakses tanggal 8 Mei 2011)
  2. ^ a b c [2] (diakses tanggal 8 Mei 2011)
  3. ^ a b c d e f g h i j k [3] (diakses tanggal 8 Mei 2011)
  4. ^ [4] (diakses tanggal 8 Mei 2011)
  5. ^ [5] (diakses tanggal 8 Mei 2011)
Sumber artikel punika saking kaca situs web: "http://jv.wikipedia.org/w/index.php?title=Kue_Kranjang&oldid=830364"