Keramik Putih Joseon

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Keramik Putih Joseon

Keramik putih Joseon ing Muséum Nasional Korea
Jeneng Koréa
Hangeul 조선백자
Hanja 朝鮮
Alih Aksara sing disampurnakaké Joseon baekja
McCune–Reischauer Chosŏn paekcha

Joseon baekja utawi keramik putih Joseon menika jinising keramik kanthi werna putih ingkang wiwitanipun dipundamel nalika masa Dinasti Joseon (1392-1910) ing Korea.[1][2] Medalipun keramik putih Joseon dipungayutaken kalihan panyebaran paham Konfusianisme kanthi wiyar minangka idéologi negara ingkang nampik Buddhisme bibar dhawahipun Dinasti Goryeo. Pehak kerajaan Joseon ngangungaken werna putih minangka perlambang Konfusianisme lan ngginakaken keramik putih minangka perabot ingkang wigati wonten ing lingkungan kasebut.[1] Keramik putih lajeng dados barang pecah belah ingkang paling kathah dipunproduksi lan dipunremeni ing periode Joseon.[1]

Sajarah[sunting | sunting sumber]

Ing wiwitan periode Dinasti Goryeo (935-1392), nalika keramik ijo tasih kathah dipunginakaken, keramik putih namung dipunproduksi kanthi gunggung ingkang sekedhik.[3] Wiwit saking dhawahipun kaum panguwaos Goryeo ing taun 1392, Konfusianisme nggantos Buddhisme minangka idéologi lan keramik ijo ingkang sadèrèngipun dipunremeni wiwit dipuntilaraken.[3] Pamarentahan Joseon nglampahi upaya khusus kanggé njagi produksi lan pangelolaanipun. Sansaya dangu masarakat Joseon wiwit ngginakaken jinis keramik énggal menika kanthi wiyar wonten ing padintenan.[3] Lajeng produksi keramik putih tuwuh kanthi cepet. [3]

Sajarah keramik putih menika kapérang dados tiga periode.[3] Periode kapisan ingkang kawiwitan saking madegipun Dinasti Joseon ing taun 1392 dumugi abad kaping 17 kala menika keramik mawi corak tatahan dipunproduksi sawetara lajeng ical.[3] Lajeng keramiki mawi corak biru (cheonghwa) dipundamel kanthi modifikasi gaya wiwitan keramik Cina kangge dipuntrepaken kalihan gaya Korea.[3] Ing periode kaping kalih, saking abad kaping 17 tengahan abad kaping 18 medal keramik ingkang dipunlukis mawi glasir coklat lan kondhang ing wiwitan abad kaping 18.[3] Keramik corak abrit ugi medal ing periode menika.[3] Ing periode kaping 3, saking abad kaping 18 dumugi abad kaping 19, keramik putih wiwit dipunproduksi kanthi ageng ananging kuwalitasipun sansaya mangandhap.[3] Keramik mawi corak biru, sapérangan dipunglasir biru-kobal ugi kondhang wonten ing periode menika.[3]

Keramik putih resik tanpa corak sapérangan ageng dipunproduksi ing wiwitan periode.[3] Keramik mawi corak tatahan kondhang kantha pola kembang lotus, kembang-kembangan, taneman lan mega.[3] Teknik tatahan kados teknik sanggam wonten ing keramik ijo.[3] Saking periode kaping kalih lan salajengipun, kadang kala desainipun dipunwukir awujud relief lajeng cara sarta pola wukiran ingkang kados mekaten sansaya kathah dipunginakaken. [3] Motif kondhang ing periode kasebut inggih menika taneman pring mawi kembang plum, pring kalihan wit cemara, seruni, simbol-simbol agami Buddha lan umur ingkang dawa, méga, kéwan bertuah, anggur, anggrèk, ulam, kepa, yuyu lan manuk.[3]

Pusat produksi[sunting | sunting sumber]

Wiwitanipun tungku ingkang damel keramik putih sapérangan ageng wonten ing sekitar wewengkon ibukota ing Gwangju (Gyeonggi), Gunung Gwanak lan Gunung Bukhan. Ananging banjur nyebar dhateng sedaya provinsi.[3] Gwangju ingkang kalebet tungku astana kerajaan tasih dipunginakaken minangka pusat produksi keramik putih.[3]

Galeri[sunting | sunting sumber]

Cathetan suku[sunting | sunting sumber]

Pranala njawi[sunting | sunting sumber]

Cithakan:Keramik Korea