Jam Gadang

Saka Wikipédia Jawa, bauwarna mardika basa Jawa

Koordhinat: 0°18′19″S 100°22′10″E / 0.305210°S 100.3694°E / -0.305210; 100.3694

Jam Gadang

Jam Gadang inggih punika sesebatan kanggé satunggalipun menara jam ingkang wonten ing jantungipun Kutha Bukittinggi, Sumatera Kilèn.[1] Jam Gadang punika sebatan ingkang dipunparingaken masarakat Minangkabau dhateng wangunan menara jam punika, amargi panci menara punika gadhah jam gadang, utawi jam ingkang ageng (jam gadang=jam ingkang ageng; gadang tegesipun ageng ing basa Minangkabau).[1]

Saking fénomenalipun wangunan menara jam punika nalika wekdal dipunyasa, saéngga wiwit madhegipun, Jam Gadang sampun dados narik kawigatén saben tiyang ingkang mirsani.[1] Amargi punika, Jam Gadang dipundadosaken satunggalipun panandha utawi markah margi Kutha Bukittinggi lan ugi minangka salah satunggalipun ikon provinsi Sumatrera Kilèn.[1]

Jam Gadang dipundamel ing taun 1926 déning arsiték Yazid Sutan Gigi Ameh.[2] Jam punika dados bebungah saking Ratu Walanda dhateng Rook Maker, controleur (Sekretaris Kutha) Bukittinggi ing wekdal papréntahan Hindhia-Walanda rumiyin.[2]

Menara jam punika sampun makaping-kaping dipunewahi wujudipun ing sisih pupus utawi pucukipun.[2] Wiwitanipun awujud bundheran lan ing nginggilipun wonten patung ayam jago.[2] Nalika njajah Indonésia, Pamarintah Jepang ngewahi wujud punika dados awujud klenthéng.[2] Sasampunipun mardika, wujudipun dipun-gantos malih kanthi ornamén griya adat Minangkabau.[2]

Cathetan suku[besut | besut sumber]

  1. a b c d Jam Gadang Gengsi kota Bukittinggi dipunundhuh tanggal 12 Agustus 2011)
  2. a b c d e f Renovasi Jam Gadang dipunundhuh tanggal 12 Agustus 2011)

Pranala njawi[besut | besut sumber]

Situs kota Bukittinggi