Ismailiyah

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados

Ismailiyah (basa Arab: الإسماعيليون al-Ismā'īliyyūn; basa Urdu: اسماعیلی Ismā'īlī, basa Persia: اسماعیلیان Esmā'īliyān) yaiku mazhab kang cacah panganuté paling gedhé kaping loro jroning Islam Syi'ah, sawise mazhab Rolas Imam (Itsna 'Asyariah). Sesebutan Ismailiyah dipikolihi pangikut mazhab iki amarga panampa wong-wonge ingatase keimaman Isma'il bin Ja'far minangka panerus saka Ja'far ash-Shadiq. Pangikut mazhab Itsna 'Asyariah, ing pihak liya nampa Musa al-Kadzim minangka Imame. Ismailiyah lan Itsna 'Asyariah padha-padha nampa enem Imam Syi'ah paling biyen, saéngga nduweni pamandeng kang padha sajroning sajarah wiwitan mazhabé.

Téologi Ismailiyah tau dadi kang paling gedhe ing antarane mazhab-mazhab Islam Syi'ah, lan mancik pucuking kakwasan politike ing mangsa kakwasan Dinasti Fatimiyah ing abad ke-10 nganti tekan ke-12 Masehi.

Ajaran Ismailiyah, kang uga dikenal kanthi jeneng mazhab Pitung Imam, ngrembaka dadi sistem kapercayane saiki sawise Imam Muhammad bin Ismail wafat; utawa "ngilang" kaya déné kapercayan pangikut Ismailiyah. Ajaran Ismailiyah nduwéni ciri panekanan ing aspek batiniah (esoterik) saka agama Islam. Dibandingake karo ngrembakane ajaran Rolas Imam kang pamikirane ana ing aspek lahiriah (eksoterik), yaiku akhbar lan ushul, mula bisa dikandakake ajaran Syi'ah ngrembaka ing rong arah kang beda: ajaran Ismailiyah kang luwih luwih akeh ngrembug kamistisan sipat sang Imam lan kamistisan dalan tumuju Allah, lan ajaran Rolas Imam kang luwih akeh ngrembug ngenani syariah lan sunnah saka Ahlul Bait.

Senajan ana saperangan klompok pecahan jroning Ismailiyah, saiki istilah iki umume digunakake kanggo nyebut komunitas Nizari. Wong-wong mau yaiku panganut saka Aga Khan, kang minangka klompok Ismailiyah kanthi gunggung panganut paling gedhe. Ing antarane klompok-klompok kang ana pancen ana bedane sajroning ngibadah lahiriah, ananging umume sacara teologi spiritual tetep trep karo kapercayan imam-imam wiwitan Ismailiyah. Kaum panganut Ismailiyah umume bisa ditemoni ana India, Pakistan, Suriah, Lebanon, Israel, Arab Saudi, Yaman, Tiongkok, Yordania, Uzbekistan, Tajikistan, Afganistan, Afrika Wetan, lan Afrika Kidul. Ing taun-taun pungkasan, saperanganwong-wong mau uga emigrasi ing Eropa, Australia, Selandia Anyar, lan Amerika Lor.


Sumber artikel punika saking kaca situs web: "http://jv.wikipedia.org/w/index.php?title=Ismailiyah&oldid=868956"