Iskander Mirza

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Iskander Mirza
Iskander Mirza

Mangsa jabatan
23 Maret 1956 – 27 Oktober 1958
Pejabat sadurungé Ghulam Muhammad
minangka Gubernur Jendral Pakistan
Pengganti Ayub Khan

Lair 13 November 1899
Tilar donya 13 November 1969
Kabangsan Pakistan

Iskander Mirza (Basa Urdu: اسکندر مرزا), lair; 13 November 1899 – tilar donya; 13 November 1969) njabat minangka Présidhèn pisanan Pakistan (1956-1958). Panjenengané uga tau njabat minangka Gubernur Jendral kaping 4 Pakistan sadurungé jabatan iku digantèkaké karo jabatan présidhèn.

Iskander Mirza dilairaké ing Murshidabad, Bengal taun 1899 lan digedhèkaké ing Mumbai. Sawisé ngrampungaké pendhidhikan dhasaré, panjenengané nerusaké studiné ing Akademi Militèr Karajan ing Sandhurst, lan dadi lulusan pisanan sing asalé saka anak bawana India ing sekolah iku. Panjenengané banjur ditugasi jroning dhines Tentara India Britania taun 1920. Mirza mung dhines suwéné enem taun ing katentaraan, lan sawisé iku panjenengané dadi wong India pisanan sing ditampa ing Dhines Pulitik India sing elit, lan akiré njabat minangka sekretaris bebarengan ing Kamentrian Pertahanan India Britania. Ing posisi iki panjenengané duwé tanggung jawab marang pembagéyan Tentara India Britania dadi Tentara Pakistan lan Tentara India.

Nalika Pakistan kabentuk, Mirza diangkat minangka Mentri Pertahanan saka negara sing anyar iku, lan ndadèkaké pegawai negri Muslim mawa jabatan paling dhuwur ing India wektu iku. Nalika taun 1954 panjenengané diangkat minangka gubernur Pakistan Wétan kanggo nentremaké wilayah sing ngalami pagolakan pulitik wektu iku. Posisi iki banjur diterusaké kanthi pangangkatané minangka Mentri Dalam Negri lan Wilayah Wewatesan jroning kabinet PM Bogra. Nalika taun 1955 panjenengané dadi Pejabat Gubernur Jendral, lan banjur dadi Gubernur Jendral pungkasan Pakistan. Iskander Mirza uga dadi panganjur gedhé skema Saunit lan percaya marang pamisahan antarané negara lan negara.

Nalika taun 1956, Pakistan nyusun konstitusiné sing pisanan, lan posisi Gubernur Jendral digantèkaké déning jabatan Présidhèn. Kaloroné sakjané padha waé, nanging Mirza resmi dipilih minangka Présidhèn déning Majelis. Nalika mangèsa kaprésidhènané, Pakistan sacara pulitik ora stabil, lan perèkara iki ditengeri déning anané papat perdhana mentri sing béda ing wektu rong taun.

Nalika taun 1958, amarga sadhar yèn Konstitusi 1956 njalari ora stabilé pulitik, Mirza ngumumaké dileksanakaké undhang-undhang kahanan darurat tanggal 7 Oktober, kanthi maksud kanggo nepungaké konstitusi anyar "sing luwih cocok karo sifat rakyat Pakistan" nalika wulan November. Panjenengané ngangkat Panglima Angkatan Darat Pakistan, Ayub Khan minangka administratur kahanan darurat. Tindakan iki menthung walik kanthi cepet amarga Ayub Khan meksa Mirza kanggo ngunduraké dhiri jroning wektu telung minggu sawisé dileksanakaké undhang-undhang darurat lan nyingkiraké dhateng Inggris. Ayub Khan ngangkat awaké dhéwé minangka Présidhèn tanggal 27 Oktober sawisé kudhéta sing ora mawè getih.

Mirza mapan ing pangasingan ing London tekan patiné taun 1969. Sawisé pamaréntahan militèr Yahya Khan nulak ngidinaké disarèkaké ing negarané dhéwé, dhisiné digawa nganggo montor mabur dhateng Teheran lan ing kana Shah Iran mènèhi upacara panyaréyan kanagaran sing layak kanggo sawijining kepala negara.


Sing mengku  sadurungé:
Ghulam Muhammad
Gubernur Jendral Pakistan
1955–1956
Diganti déning:
Sing mengku  sadurungé:
Présidhèn Pakistan
23 Maret 1956 - 27 Oktober 1958
Diganti déning:
Ayub Khan


Sumber artikel punika saking kaca situs web: "http://jv.wikipedia.org/w/index.php?title=Iskander_Mirza&oldid=822999"