Ès cincau

Saka Wikipédia Jawa, bauwarna mardika basa Jawa
(Kaelih saka Es cincau)
Aksara Latin
     
Ès cincau seger

Ès cincau utawi asring dipunsebat ès camcao inggih punika salah satunggaling jinis ombèn-ombèn ingkang seger raosipun ingkang dipundamel saking cincau ijo utawi cincau ireng lajeng dipunsukani santen ingkang sampun dipungodhog ugi saged dipunwimbuhi ès manawi ngersakaken unjukan asrep. Cincau ijo piyambak ugi dipunwastani daluman. Kajawi saged dados tamba nalika ngelak, ès cincau punika paédahipun ugi saged damel padharan langkung asrep boten bentèr.

Bahan-bahanipun[besut | besut sumber]

Bahan-bahan ingkang dipunbetahaken kanggé damel duduh ès cincau ingkang dipundamel saking santen inggih punika kados makaten:[1]

  • cincau ijo 250 gram
  • santen 1,5 liter ingkang dipundamel saking 1 wutir klapa
  • uyah sacekapipun
  • ron pandan wangi 1 lembar
  • susu kenthel manis
  • sirup gula abrit 200 ml
  • ès serut sak cekapipun

Déné bahan-bahan ingkang dipunginakaken kanggé damel sirup abritipun inggih punika kados makaten:

  • 300 gr gendhis pasir.
  • 100 ml toya
  • 2 lembar ron pandan.
  • 2 lembar ron jeruk.
  • somba abrit utawi pewarna abrit.

Caranipun Damel[besut | besut sumber]

Caranipun damel ès cincau punika gampil tur prasaja sanget kados ingkang kaandharaken ing ngandhap punika:[2]

  1. Ingkang sapisan inggih damel bahan-bahan sirupipun kanthi cara nggodhog toya rumiyin ngantos umub, lajeng dipunsukani gendhis pasir, ron pandan, ron jeruk, saha pewarna abrit.
  2. Santen, sarem, saha ron pandan wangi dipuncampur dados satunggal lajeng dipungodhog wonten ing nginggil geni sedheng kanthi asring dipunudhak ngantos umub. Manawi sampun umub saged dipunangkat saha saged dipundhemaken ngantos sumubipun ical.
  3. Sirup saged dipuncuraken wonten ing gelas saji
  4. Lajeng saged dipuntambahaken santen ing nginggilipun sacekapipun.
  5. Manawi sampun cincau ijo utawi jinis cincau sanèsipun saged dipunlebetaken lan ing pérangan nginggil piyambak saged dipunsukani ès serut sacekapipun.
  6. Ès cincau sampun samekta dipunsajèkaken.
  7. Kangge tiyang ingkang remen kaliyan susu, sadèrèngipun dipunsukani ès, ing pérangan ngandhapipun saged dipunsukani susu kenthel manis rumiyin, nembé saged dipununjuk.

Cathetan suku[besut | besut sumber]

  1. [1] Archived 2012-11-30 at the Wayback Machine. Resep Ès Cincau Kuah Santan (dipunundhuh tanggal 24 Dhésèmber 2012)
  2. [2] Es Cincau Selasih (dipunundhuh tanggal 24 Dhésèmber 2012)