Anggur Jerman

Kebon anggur ing pinggiring Kali Mosel

Riesling Kabinett

Anggur Jerman punika jinising anggur ingkang asalipun saking Jerman. Unjukan anggur punika unjukan ingkang dipunremeni déning tiyang Jerman kejawi bir. Produk anggur Jerman ingkang paling kondhang punika Riesling ingkang gadhah ciri kas kecut lan saged dados kanca kanggé manéka jinis masakan.

Sajarah

Prosès damel anggur wonten ing Jerman punika sampun kawiwitan saking taun 100 SM ingkang dipunlampahi déning Bangsa Romawi. Wonten ing abad tengahan, para biarawan nglajengaken tradisi damel anggur lan miyaraken lahan anggur ingkang taksih produktif dumugi sapunika. Produksi anggur Jerman mandhap sanget nalika dekade 60 lan 70-an nalika sapérangan ageng anggur legi dipundamel kanggé dipunekspor. Budidaya anggur vitikultur) ing Jerman dipunlampahi kanthi tliti supados ngasilaken unjukan mawi kuwalitas saée. Pérangan punika dipundukung mawi teknologi inggil nanging ramah lingkungan. Tiyang Jerman manèn anggur mawi tngan lan nyimpen anggur putih wonten ing tangki baja anti karat déné anggur abrit punika dipunsimpen wonten ing tong saking kayu oak. Sapunika, Jerman gadhah kathah produsen alit ingkang damel unjukan anggur ingkang gadhah kuwalitas. Kaluwihan saking anggur Jerman punika amargi nagara mau gadhah manéka jinis anggur ingkang dipundamel unjukan anggur mawi kuwalitas, mliginipun anggur saking lèr Jerman ingkang kondhang minangka jinis ingkang paling gadhah mutu amargi lemahipun ingkang subur.

Kaluwihan

Anggur Jerman ingkang saé punika kondhang awit saking rasanipun ingkang alami lan ènthèng ugi seimbang antawisipun rasa legi lan kecut. Sapérangan ageng kebon anggur dipunbudidayakaken ing ngandhaping bukit, mliginipun wonten ing pinggiring Kali Rhein lan Kali Mosel sarta cabang-cabangipun saéngga pikantuk cahya srengéngé ingkang dipunpentalaken saking toya kali. Anggur Jerman ingkang mateng kanthi alon prabawa marang rasa ingkang seger lan kecut. Jerman damel sakedhik anggur abrit lan kathah anggur putih ugi rosé (jambon) kanthi rasa ingkang asring trocken (pait) utawi halbtrocken (setengah pait) ingkang kaserat wonten ing label. Bènten kaliyan dessert kanthi bahanipun saking unjukan anggur ingkang rasanipun tansah legi.

Laladan ingkang ngasilaken anggur

Anggur Jerman punika asalipun saking kawasan kanthi iklim adhem saéngga dipunbudidayakaken wonten ing lèrèng ingkang madep ngidul supados tansah kénging cahya srengéngé terus. Kajawi punika wonten ugi kebon anggur ing lembah kali kados Rhein lan Mosel amargi toya kali saged ngatur suhu nalika wanci dalulan saged mentalaken angeting cahya srengéngée. Tigang papan ingkang ngasilaken anggur Jerman ingkang paling gadhah kuwalitas punika ing dhataran curam ing sedawaning pinggiran Kali Mosel, laladan Rheingau, sarta dhataran Rheinhessen.

Kathah wisatawan asing ingkang dugi ing salah satunggal laladan ingkang ngasilaken anggur. Saking mangsa reunifikasi, gunggunging wisatawan ingkang dugi ing Jerman Wétan punika nambah, Dhaéerah anggur tradhisional Jerman, ingkang mbentang saking pérangan tengah Rhein ing Bonn dumugi Tlaga Constance ing watesan Switserlan punika laladan ingkang kathah piyambak dipunparani déning wisatawan amargi wonten ugi papan-papan mawi sajarah, sumber toya panas, griya-griya tradhisional mawi empyak (payon) ireng putih ing désa wiyosipun Grimm lan sedhèrèk sarta sesawangan ingkang éndah.

Ugi pirsani

• Masakan Jerman